InfoHub Logo

Elimizde qalaaralyq jáne oblysaralyq avtobýs qatynastaryndaǵy erejeler ózgeredi. Bıletter, baǵyttar, lısenzıalar men tasymaldaýshylarǵa beriletin sýbsıdıalar endi sıfrlyq júıede basqarylady. Bul týraly Orda.kz habarlaıdy.

Negizgi jańalyq – kólik qujattaryn basqarýdyń biryńǵaı júıesi engiziledi. Bul júıe jolaýshylar tasymalyna qatysty qujattardy tirkeý, esepke alý jáne saqtaý qyzmetin atqarady. Júıe memlekettik organdar men tasymaldaý prosesine qatysýshylarǵa derekterdi jiberip otyrady.

Sonymen qatar, jol júrý aqysyn tóleý erejeleri de ózgeredi. Halyqaralyq, qalaaralyq, oblysaralyq jáne aýdanaralyq avtobýs baǵyttarynda jolaýshylar bıletterdi avtovokzal kasalarynan ǵana emes, sıfrlyq tólem júıeleri men elektrondy bılet satý agentteri arqyly da satyp ala alady.

Jolaýshylardy otyrǵyzý bılet pen jeke kýáliktiń negizinde júzege asyrylady. Túpnusqa qujatty da, onyń elektrondy nusqasyn da paıdalanýǵa bolady.

Tasymaldaýshylarǵa arnalǵan ózgerister

Tasymaldaýshylar úshin de jańalyqtar bar. Olar áleýmettik mańyzy bar baǵyttar boıynsha sýbsıdıa alýǵa ótinishterdi «sıfrlyq úkimet» portaly arqyly bere alady. Bul qalalyq, aýyldyq, qala mańyndaǵy, aýdan ishindegi jáne aýdanaralyq tasymaldarǵa qatysty.

Regýlárly qalalyq, aýyldyq, qala mańyndaǵy jáne aýdan ishindegi tasymaldardyń baǵyttary men kesteleri de elektrondy júıe arqyly bekitiledi. Ol úshin tasymaldaýshy baǵyt syzbasyn jáne kestesin usynýy tıis.

Avtobýstar men shaǵyn avtobýstarmen júzege asyrylatyn retsiz halyqaralyq, oblysaralyq, aýdanaralyq tasymaldarǵa arnalǵan lısenzıalar da portal arqyly rásimdeletin bolady. Lısenzıany alý bes jumys kúni, qaıta resimdeý úsh jumys kúni, al dýblıkat alý eki jumys kúni ýaqyt alady.

Bul normalar 2026 jyldyń 12 shildesinen bastap tolyq kúshine enedi.