InfoHub Logo

Almatyda ótken Fashion Week Almaty sán aptalyǵy bıyl tek dızaınerlik toptamalarymen ǵana emes, erekshe qonaqtarymen de este qaldy. Solardyń biri – tanymal telejúrgizýshi ári medıamenedjer Láılá Sultanqyzy. Ol kútpegen jerden podıýmǵa model retinde shyǵyp, kópshilikti tańǵaldyrdy.

Kórsetilimnen keıin Láılá Sultanqyzy áleýmettik jelidegi paraqshasynda óziniń jańa qyrynan kórinýden qoryqpaý kerektigin jetkizgen áserli jazba jarıalady. «Elýge kelip esirdi demeńiz, erkinsidim», – dep jazdy ol. Bul sózderimen Láılá Sultanqyzy kez kelgen jasta ózińdi jańa baǵytta synap kórýdiń mańyzyn atap ótti.

Keshtiń erekshe sátteriniń biri – kórermender zalynda túsirilgen beıne. Onda telejúrgizýshiniń anasy qyzynyń podıýmdaǵy júrisin tolqyp tamashalap otyrǵany kórinedi. Anasynyń meıirimge toly kózqarasy men ishki qýanyshy jeli qoldanýshylarynyń júregin eljiretip, erekshe áser qaldyrdy.

Buǵan deıin Láılá Sultanqyzy áleýmettik jelidegi paraqshasynda jeke ómirine qatysty jazba jarıalap, ózine baǵyttalǵan syn-pikirlerge jaýap bergen bolatyn. Sondaı-aq ol «Qazaqstan» arnasyndaǵy «1001 tún» baǵdarlamasynda qonaq bolyp, jeke ómiri men otbasy taqyrybyna qatysty pikir bildirgen edi.

Láılá Sultanqyzy týraly

Láılá Sultanqyzy – Qazaqstandaǵy belgili jýrnalıs, telejúrgizýshi jáne medıamenedjer. Ol 1977 jyldyń 8 jeltoqsanynda Shymkent qalasynda dúnıege kelgen. Joǵary bilimin Ál-Farabı atyndaǵy Qazaq ulttyq ýnıversıtetiniń jýrnalısıka fakúltetinde alyp, kásibı jolyn osy salada qalyptastyrdy.

Eńbek jolyn 1997 jyly «Shahar» teleradıokompanıasynda telejúrgizýshi retinde bastap, keıin prodúser qyzmetine deıin kóterildi. 2003-2006 jyldary «Hıt TV» arnasyna jetekshilik etip, medıamenedjment baǵytynda tájirıbe jınaqtady.

2008 jyldan bastap Qazaqstan teleradıokorporasıasy júıesinde túrli qyzmet atqaryp, birqatar jobalardyń prodúseri boldy. Sonymen qatar «Kazmedia Mobile» kompanıasynyń bas dırektory qyzmetin atqardy. 2012 jyly «Balapan» telearnasyna basshylyq etip, balalarǵa arnalǵan sapaly kontenttiń damýyna úles qosty.

Láılá Sultanqyzy «Áıel baqyty» tok-shoýynyń avtory ári júrgizýshisi retinde keńinen tanylyp, qazaq medıa keńistiginde kásibı sheberligimen erekshelendi. Onyń eńbegi memleket tarapynan joǵary baǵalanyp, 2015 jyly «Qazaqstan Mádenıet salasynyń úzdigi» ataǵyna, al 2016 jyly «Qazaqstannyń eńbek sińirgen qaıratkeri» qurmetti ataǵyna ıe boldy.

Bul týraly Infohub.kz aqparat agenttigi habarlaıdy.