InfoHub Logo

Esse: Jýrnalıs bolǵym keledi

Men qalaıda jýrnalıs bolam. Nege deısiz ǵoı, meniń bala kezden armanym bolǵan mamandyq meni kóp oqýǵa, erinbeı izdenýge, saýatty da kórkem jazýǵa, durys sóıleýge jetelep keledi. Jýrnalıs – men úshin ómirdegi eń mártebeli, qıyn da qyzyq mamandyq.

Kaspııdiń býyrqanǵan tolqyndy kúni de, typ - tynyq, móp - móldir ashyq kúni de ózim jaǵasynda ósken osynaý kók teńizge kelip, jaǵada otyryp - otyryp ketem. «Teńizge ne úshin barasyń?»- dep eshkim de suraǵan emes. Ózim de tis jaryp eshkimge aıtqan emespin. Qart Kaspıımen qoltyqtasqan shap - shaǵyn ásem Fort - Shevchenko qalasynda týyp, óskenime táýba deımin. Meniń syrlasym da, muńdasym da – osy kók teńiz jáne qoıyn dápterim. Sol qoıyn dápterimdegi jazbalarymdy jyl ótken saıyn oqysam, keıde osyny ózim jazdym ba dep te tań qalatyn kezderim bolady. Al arman týraly bylaı jazyppyn ana bir jyly: «Arman! Shirkin, arman! Qol jetpeıtindeı ózińe umtyla berem, umtyla berem. «Alla óziniń súıgen qulyna beredi» demekshi, maǵan da oń kózińmenen qarap, osynaý armanymdy oryndashy... adam shirkinde arman taýsylǵan ba? Meniń armanym – jýrnalıs bolý. Jaı ǵana jýrnalıs emes, halyqtyń muńyn muńdap, joǵyn joqtaıtyn maman. Eldiń kózi, qulaǵy, úni bolǵym keledi. Jańalyqtardyń jarshysy bolǵym keledi...». Búgin teńiz jaıbyraqat tynysh jatyr eken. Sol tynyshtyqqa baryp, qoıyn dápterimdegi arman týraly jazbalarymdy teńizdiń tolqyndaryna daýystap oqyp berdim. Bir - birin qýalaǵan tolqyndar meniń armanymdy alysqa alyp ketip jatty, ketip jatty. Jýrnalıs bolsam degen armanymnyń oryndalatynyna senip men turdym.

Mektepte «Jas qalam» ádebı birlestiginiń beldi múshesimin. Birlestiktiń maqsaty – jazýǵa talaby bar oqýshylardyń basyn qosyp, tájirıbe almastyrý. Sondaı - aq til baılyǵyn arttyryp, rýhanı jan dúnıesin baıytý, oqýshylardyń jazǵan tyrnaqaldy týyndylaryn taldap, artyq - kem tustaryn aıtý. Bul birlestikten kóp nárseni kóńilge túıdim. Jazǵan áńgime, maqalalarymdy ortaǵa saldym. Meniń jazǵandarym ustazdaryma da, qatar qurbylaryma da unaıdy. Kemshin tustary bolsa, ustaz apaıym aıtyp otyrady. Qalamymdy ushtadym. Áńgime, maqala jazýǵa mashyqtana tústim. Jýrnalısik mamandyqqa degen yntam arta tústi.

Alystan jýrnalıs bolsam degen arman shaqyrǵan saıyn «HHİ ǵasyrdyń jýrnalısi qandaı bolý kerek?» degen oı turady. Dana Nurjigittiń «Dara jol», Jaına Slambektiń «Bizdiń ýaqyt», Láılá Sultanqyzynyń «Áıel baqyty» baǵdarlamalaryn qarap otyryp, qazirgi zamanǵa saı jýrnalıs apaılarym ekenine shúbá keltirmeımin. Men teledıdardan ásirese, Dana Nurjigit apaıymnyń júrgizgen habarlaryn úzbeı, qyzyǵa tyńdaımyn. Dana Nurjigittiń «Dara jol» baǵdarlamasy – adamdy ózine baýrap alatyn tamasha suhbat - habar. Ol apaıdyń ózin - ózi ustaýy óte shynaıy, sóıleý mashyǵy adamdy jalyqtyrmaıdy, qyzyqtyra túsedi. Sol kisi bolyp, ózim ońashada «habarlar» júrgizem. Meniń de ózimniń «Dara jolym» bar. Bir kúni ana bir jazýshymen, taǵy bir kúni ana bir aqynmen, sabaq beretin barlyq ustazdarymmen «suhbattar» júrgizip, túrli suraqtar qoıyp, oǵan ózim jaýap berip, biraz tájirıbe jınaqtadym. Sóıtip Dana apaıymnan kóp nárse úırendim. Endi sol úırengenderimnen nátıje shyǵaryp, óz jolymdy tapsam deımin. Jýrnalıs bolý úshin sóz saptasymmen birge symbatym da ádemi bolý kerek. Ol jaǵynan da qur emespin. Qurbylarym «Sulý qyz» dep shaqyrǵanyna, jeńgemniń «Sulýym» dep at qoıǵanyna qaraǵanda, syrtqy sulýlyǵymnyń bar ekendigin de bilemin, ózime ózim rıza bolamyn. Mine, endi mektepti oıdaǵydaı aıaqtap, jýrnalısıka mamandyǵyna baryp, qujat tapsyryp, synnan ótýge daıyndalyp júrmin.

Alystaǵy armandar qol bulǵap meni shaqyra beredi. Osynaý sóz qadirin biletin mamandyqqa qyzyǵýshylyǵym kún sanap artyp keledi. Arman jolynda aıanbaı izdeniýmen kelemin. Men qalaıda jýrnalıs bolam. Jáne bul armanymnyń oryndalatynyna kámil senemin. Arman aldamaıdy.

Sultanova Lázzat Súleımenqyzy