InfoHub Logo

Italıada Qysqy Olımpıada oty jandy

Italıanyń Mılan jáne Kortına-d'Ampesso qalalarynda XXV qysqy Olımpıada oıyndarynyń resmı ashylý saltanaty ótti. Bul týraly Infohub.kz aqparat agenttigi habarlaıdy.

Mılandaǵy «San-Sıro» stadıonynda ashylýdyń basty saltanaty ótti.

Jarysqa álemniń 93 elinen kelgen 3 myńǵa jýyq sportshy qatysady. Sportshylar 8 sport túrinen 16 jarys boıynsha medaldar sarapqa salady, barlyǵy 116 medal jıyntyǵy.

Qazaqstandyqtardyń qatysýy

Qazaqstannyń Týrızm jáne sport mınıstrligi óz Telegram-arnasynda Mılannan túsirilgen kadrlardy jarıalady.

Merekelik sherýde Qazaqstan týyn short-trek ókili Denıs Nıkısha jáne frıstaıl-mogýl sportynyń sportshysy Aıaýlym Ámrenova ustap shyqty.

Olımpıadanyń basty erekshelikteriniń biri – ashylý saltanatynyń tórt alańda bir ýaqytta ótýi boldy. Denıs Nıkısha saltanatqa Mılanda qatysty, al Aıaýlym Ámirenova shańǵy jarystary ótetin Lıvıno komýnasyndaǵy saltanatqa qatysty, dep habarlady mınıstrlik.

Olımpıada oty birden eki jerde – Mılandaǵy Trıýmf arkasynda jáne Kortına-d'Ampesso qalasyndaǵy Piazza Dibona alańynda jaǵyldy. Saltanattyń resmı ataýy – Armonia («Úılesim»).

Mádenı sátter

DW Telegram-arnasynyń jazýynsha, ashylý saltanatynda mádenı aksentter kóp boldy. Mysaly, stadıonda Antonıo Kanovanyń «Amýr men Psıheıa» músininiń sahnalyq nusqasy kórsetildi, oǵan «La Skala» teatrynyń balet mektebiniń 70-ke jýyq bıshisi qatysty.

Saltanattyń mýzykalyq bólimi ártúrli janrlardy qamtydy: Vıvaldı men Rossınıdiń klasıkalyq mýzykasynan qazirgi zamanǵy ıtalán estradasyna deıin. Italándyq operaǵa erekshe nazar aýdaryldy, kúlmınasıasy Pýchchınıdiń «Týrandot» operasynan Nessun dorma arıasynyń oryndalýy boldy.

Saltanatta sonymen qatar ıtalándyq týdyń tústerinen shabyt alǵan sán kórsetilimi ótti, onda Armani koleksıasyn kórsetken modelder boldy. Bul qyrkúıek aıynda 91 jasynda qaıtys bolǵan ıtalándyq dızaıner Djordjo Armanıge degen qurmet.

Mılan–Kortına qysqy Olımpıadasy 6-22 aqpan aralyǵynda ótedi.

Qazaqstan quramasynan 36 sportshy (18 erler jáne 18 áıel) 10 sport túrinen synǵa túsedi. Qazaqstan ulttyq quramasynyń qatysýymen barlyq jarystar Qazaqstan, Qazsport, «Habar» jáne Jibek Joly telearnalarynda tikeleı efırde kórsetiledi.