InfoHub Logo

Belgıada Qazaqstannyń birqatar aımaqtyq aqparat quralynyń ókilderi, onyń ishinde QazaqToday aqparat agenttiginiń basshysy elshi Roman Vasılenkomen kezdesti, dep habarlaıdy infohub.kz aqparat agenttigi.

Brússelge biliktilikti arttyrý kýrstary aıasynda kelgen jýrnalıser tobyn Túrkitildes jýrnalıser qorynyń prezıdenti Názıa Joıamergenqyzy bastap bardy. Delegasıa quramynda «infohub.kz» dırektory Meıirjan Áýelhanuly, «Jetisý» radıosy, «Qostanaı tańy» gazeti, «Qyzyljar-Aqparat» medıaholdıngi, «Turkistan Media Holding» jáne «Almaty» telearnasynyń ókilderi boldy.

Kezdesýde elshi Roman Vasılenko Qazaqstannyń Eýropalyq odaqpen (EO) aradaǵy qarym-qatynasynyń negizgi baǵyttaryna toqtaldy. Onyń aıtýynsha, EO – Qazaqstannyń eń iri saýda jáne ınvestısıalyq seriktesi.

«Eýropalyq ınvestısıalardyń Qazaqstan ekonomıkasyna salynǵan jalpy kólemi 200 mlrd dollardan asty, al Qazaqstan EO-ǵa ımporttalatyn munaıdyń shamamen 13%-yn qamtamasyz etedi», — dep atap ótti elshi.

Sonymen qatar taraptar kólik salasyndaǵy, ásirese Transkaspıı halyqaralyq kólik baǵyty aıasyndaǵy yntymaqtastyqty belsendi damytyp jatyr. Sondaı-aq synı shıkizat, jasyl energetıka jáne sıfrlandyrý sıaqty jańa baǵyttarda seriktestik nyǵaıyp keledi.

Kezdesý barysynda kóterilgen mańyzdy máselelerdiń biri – vızalyq rejımdi jeńildetý. Elshiniń sózinshe, qazir Qazaqstan men Eýropalyq odaq arasynda osy másele boıynsha kelissózder jalǵasyp jatyr.

Elshi Qazaqstan men Belgıanyń ekijaqty qatynastarynyń oń qarqyn alǵanyn da tilge tıek etti. Búginde Qazaqstanda Ahlers, Sarens, Carmeuse, Solvay jáne Jan De Nul sıaqty iri belgıalyq kompanıalar jumys isteıdi. Al 2024 jyldyń qańtarynda Brússelde Qazaqstannyń mádenı ortalyǵy ashylǵan bolatyn.