InfoHub Logo

Fransıada elektr júıesine qasaqana shabýyl jasaldy ma? Kann men Nıssa jaryqsyz qaldy

Fransıanyń ońtústik-shyǵysyndaǵy Kann jáne Nıssa qalalarynda eki kún qatarynan jaryq óship, on myńdaǵan turǵyn elektr qýatynsyz qaldy. Jergilikti bılik ókilderi bul oqıǵalardy qasaqana jasalǵan shabýyl dep boljaýda.

Senbi kúni Kann qalasynda elektr jelisi isten shyǵyp, 160 myń adam jaryqsyz qaldy. Qozǵalys qıyndap, baılanys pen ınternet qyzmetteri toqtady. Bul oqıǵa Kann kınofestıvali qarsańynda oryn aldy.

Ertesine, Nıssa qalasyndaǵy qosalqy stansıada túnde órt shyǵyp, 45 myń adam jaryqsyz qaldy. Qalanyń qoǵamdyq kóligi men áýejaıy ýaqytsha jumysyn toqtatty. Tergeý barysynda stansıa esigin buzyp kirý belgileri men kólik izderi anyqtalǵan.

Qazir eki oqıǵa boıynsha da qylmystyq is qozǵalyp, tergeý amaldary júrgizilýde. Bılik tarapynan bul shabýyldardyń uıymdasqan sıpatta bolýy múmkin degen nusqa qarastyrylýda.