InfoHub Logo

Fransıanyń ońtústigindegi tanymal Antıb múıisinde ornalasqan elıtalyq Parc du Cap turǵyn úı kesheninen páterler satylymǵa shyǵaryldy. Ashyq derekkózderdegi málimetterge súıensek, bul nysandar Qazaqstan bıligi tárkilegen aktıvterge tolyq sáıkes keledi. Áńgime eks-prezıdent Nursultan Nazarbaevtyń nemere inisi Qaırat Satybaldy men onyń úsh jubaıyna tıesili bolǵan múlikter týraly bolyp otyr.

Bul týraly Infohub.kz aqparat agenttigi habarlaıdy.

Mańyzdy derekter

“Vyhod k morú” telegram arnasynyń habarlaýynsha, páterlerdi satý týraly habarlandyrýlar sheteldik jyljymaıtyn múlikke mamandanǵan Prian agenttiginiń saıtynda jarıalanǵan. Satylymda turǵan tórt páterdiń josparlanýy men ornalasýy Qaırat Satybaldy jáne onyń jubaılary — Saıda Qanatbekqyzy, Ásel Bahtıarqyzy men Gúlmıra Qaýasqyzyna tıesili bolǵan aktıvterge dál keledi.

Atalǵan páterler KS Propriete, SK Propriete, AB Propriete jáne GK Propriete atty tórt kompanıanyń atyna rásimdelgen. Bul zańdy tulǵalar Monakoda tirkelgendikten, olardyń qazirgi naqty ıesin ashyq derekkózder arqyly anyqtaý múmkin emes. Degenmen, aktıvter Qazaqstan paıdasyna tárkilengenin eskersek, olardy basqarý quqyǵy Kompanıa po ýpravlenıý vozvrashónnymı aktıvamı qaramaǵyna ótken bolýy yqtımal.

Fransıadaǵy bul jyljymaıtyn múliktiń jalpy quny shamamen 8,7 mln eýroǵa baǵalanyp otyr. Satylymnan túsken qarajat Qazaqstan búdjetine aýdarylýy tıis.

Páterlerdiń sıpattamasy

Barlyq páterler bir stılde, artyq sán-saltanatsyz jasalǵan. Árqaısysynda jeke jýynatyn bólmesi bar úsh jatyn bólme, qonaq bólme, as úı jáne balkon bar. Páterler tolyq jıhazdalǵan. Keshende kúzet, jerasty parkıngi, fıtnes zaly, SPA, saýna, baseın jáne teńizge kórinis bar.

Aktıvter Qazaqstanda da satylymda

Qaırat Satybaldydan tárkilengen múlik tek Fransıada ǵana emes, Qazaqstanda da satylymǵa shyǵarylýda. Sáýir aıynyń basynda Almatydaǵy Kaisar Plaza saýda-keńse ortalyǵy aýksıonǵa qoıylmaq. Bastapqy baǵasy — 62 mlrd teńgege jýyq. Sondaı-aq DoubleTree by Hilton qonaqúıi men «Baısat» bazaryn satý josparlanǵan. «Baısat» bazarynan shamamen 4 mlrd teńge túsirý kózdelip otyr.

Tárkilengen aktıvterdiń bir bóligi memlekettik mekemelerge berildi. Mysaly, Almatydaǵy birneshe bıznes-ortalyqqa ǵylymı jáne bilim berý uıymdary ornalastyrylsa, aıaqtalmaǵan qonaqúı sot ákimshiligi departamentine ótken.

Kontekst

Qaırat Satybaldy 2022 jyldyń qyrkúıeginde iri kólemdegi urlyq boıynsha 6 jylǵa bas bostandyǵynan aıyrylǵan bolatyn. 2024 jyly onyń jazasy bostandyǵyn shekteýmen aýystyryldy. Sol ýaqytqa deıin ol memleket baqylaýyna 732,8 mlrd teńge (shamamen $1,5 mlrd) kólemindegi aktıvterdi ótkizgen.