InfoHub Logo

Gaza sektorynda ashtyqtan qaza tapqandar sany 175 adamǵa jetti – gýmanıtarlyq apat ýshyǵýda

Izraıl qorshaýyndaǵy Gaza sektorynda jaǵdaı kún ótken saıyn kúrdelenip barady. Sońǵy málimetterge sáıkes, ashtyqtan kóz jumǵan palestınalyqtardyń sany 175 adamǵa jetken. Gazanyń Densaýlyq saqtaý mınıstrligi bir kún ishinde taǵy alty adamnyń qaıtys bolǵanyn habarlady. Qurbandardyń 93-i – balalar. Bul óńirdegi gýmanıtarlyq daǵdarystyń qanshalyqty tereńdegenin kórsetedi.

Azyq-túlik, taza aýyz sý men dári-dármek qatty tapshylyqqa ushyraǵan. Izraıl tarapynan engizilgen tolyq qorshaý jaǵdaıynda kómek jetkizý múmkindigi shektelgen. Jergilikti derekkózder Tel-Avıv bıligi ashtyq pen shóldi halyqqa qarsy qysymnyń quraly retinde paıdalanyp otyr degen alańdaýshylyq bildirýde.

BUU-nyń resmı málimetine súıensek, sońǵy kúnderi gýmanıtarlyq kómek taratylyp jatqan aımaqtarǵa jasalǵan shabýyldar saldarynan 100-den astam beıbit turǵyn qaza taýyp, júzdegen adam jaralanǵan. Izraıl áskeri Gaza aýmaǵyndaǵy azamattyq nysandar men qıraǵan aımaqtarǵa soqqylaryn jalǵastyryp jatyr.

Qazirgi ýaqytta 2 mıllıonnan astam adam birneshe ret qonys aýdarýǵa májbúr bolyp, panasyz jáne qaýipsiz aımaq tappaı otyr. Halyqaralyq uıymdar men quqyq qorǵaý uıymdary aımaqtaǵy ahýaldy "gýmanıtarlyq apattyń sharyqtaý shegi" dep baǵalap otyr.