InfoHub Logo

Germanıanyń Leıpsıg qalasynda baǵymdaýly jolbarys ıesine shabýyl jasap, keıin atylyp ketti. Quqyq qorǵaý organdarynyń málimetinshe, zardap shekken adam – janýarǵa kútim jasasýǵa kómektesken 73 jastaǵy er adam.

Bul týraly Infohub.kz aqparat agenttigi habarlaıdy.

Er adam jeńil jaraqat alyp, aýrýhanaǵa jetkizilgen. Al jolbarys ony ustap otyrǵan ǵımaratty aınalyp ótip, shamamen 300 metrdeı jerge deıin qashyp úlgergen. Polısıa kelgenshe jarty saǵattaı syrtta júrgen janýardy oqıǵa ornyna kelgen tártip saqshylary atyp tastady.

«Jolbarystardyń patshaıymy»

Basylymnyń jazýynsha, óltirilgen jolbarystyń ıesi ataqty jattyqtyrýshy Karmen Sander bolǵan. Ol "jolbarystardyń patshaıymy" degen laqap atymen de tanymal. Sander ónerkásip aımaǵyndaǵy aýmaqta on jabaıy mysyqty tar jaǵdaıda ustap otyrǵan. 2022 jyldan bastap oǵan janýarlaryn komersıalyq negizde kórsetýge tyıym salynǵan.

Qarjylyq qıyndyq

Buryn Sander Eýropany aralap, tanymal bolǵan. Alaıda, jabaıy janýarlarmen óner kórsetýden bas tartqan sırkter kóbeıgen soń, ony shaqyrý sırekteı bastaǵan. Bılik janýarlarǵa zooparkterdegideı jaǵdaı jasaýdy talap etedi, biraq Sanderdiń janýarlardy ustaıtyn jeri mundaı talapqa saı kelmeıdi.

Jaqynda Sander janýarlarmen óner kórsetýge tyıym salynǵanyna qaramastan, ony buzǵany úshin sotqa tartylǵan. Onyń aıtýynsha, bul áreketi qarjylyq sebeptermen baılanysty bolǵan. Sebebi, tek janýarlardyń tamaǵyna aıyna 4500 eýro ketedi. Onyń ústine, 2025 jyldyń basynda taǵy alty jolbarys tóldegen.