InfoHub Logo

Germanıalyq týrıs Grekıadaǵy demalys kezinde shezloń tappaǵany úshin týroperatordan 986 eýro ótemaqy aldy. Bul týraly The Guardian basylymyna silteme jasap Tengri Travel habarlady.

Gannoverdegi sot sheshimi boıynsha, er adam men onyń otbasy demalys kezinde jaǵajaıdaǵy oryndyqtardyń ornyna beton ústinde jatýǵa májbúr bolǵan. Týrıs otbasymen birge Kos aralyna barǵanda, tańerteń erte tursa da, shezloń taba almaǵanyn aıtqan.

Ol áıeli men eki balasy úshin 7000 eýrodan astam aqsha tólegenimen, búkil demalys boıy jaǵajaıda orynsyz qalǵan.

Týrıs qonaqúıge shaǵymdanǵannan keıin ishinara aqshasyn qaıtaryp alǵan. Alaıda, Gannoverdegi aýdandyq sot otbasynyń tolyq ótemaqy alýǵa quqyly ekenin jáne týroperatordyń jaýapkershiligin moıyndady.

Sot otyrysynda týrıs qonaqúı men týroperatordyń erejelerdi saqtamaǵanyn, ıaǵnı shezlońtardy «súlgimen» belgileýge tyıym salatyn erejelerdi oryndatpaǵanyn aıtty. Onyń qonaqúı qyzmetkerlerine jasaǵan ótinishterine qaramastan, eshqandaı shara qoldanylmaǵan.

Sot sheshiminde týroperatordyń qonaqúımen kelisimshart jasasqanda, shezlońtar men demalýshylar sany arasynda «aqylǵa qonymdy» tepe-teńdikti qamtamasyz etetin júıeni usyný mindetti ekeni atap ótildi.

Bul sheshim «súlgi soǵystary» dep atalatyn máselege qatysty sottyń alǵashqy sheshimderiniń biri boldy. Bul jaǵdaı Eýropadaǵy pakettik týrlardyń ajyramas bóligine aınalǵan.