InfoHub Logo

Qazaqtyń baıyrǵy emshilik dástúrinde sırek kezdesetin erekshe ádis – ilgirdiń kómegi. Bul ataý tamaǵyna zat turyp qalǵan sábıge shapshań ári dál áreket jasap, bógde deneni alyp shyǵatyn adamdarǵa qatysty qoldanylady. Medısınalyq jolmen anyqtaý nemese emdeý múmkin bolmaı jatqan jaǵdaıda, ilgirlerdiń sheberligi keıde sheshýshi ról atqarady.

Ádette jas balanyń tamaǵyna jemis-jıdek qabyǵy, qaǵaz, plasık nemese ózge de usaq zattar túsip ketip, jutqynshaqty bitep qoıady. Mundaıda bala sebepsizden-sebepsiz qusady, ishi ótedi, tamaq ishýden bas tartady. Ata-analar kóp jaǵdaıda bul belgilerdi ýlaný, vırýstyq ınfeksıa nemese basqa aýrýmen shatastyryp, nátıjesiz emge júginedi. Al halyq eminiń bilgirleri – ilgirler mundaı jaǵdaıdyń tamyryna tez jetip, balanyń tynysyn ashyp, jeńildik ákeledi.

İlgir adamnyń ádisi – qarapaıym kóringenimen, asa dáldik pen eptilikti qajet etedi. Kóbine balanyń aýzyna suq saýsaǵyn salyp, bógde zatty áp-sátte shyǵaryp alady. Bul áreketti kóz ilespes jyldamdyqpen oryndaıdy, al nátıjesi kóp jaǵdaıda dereý bilinedi: bala tamaq surap, qusýy toqtap, boıyna ál keledi.

Halyqtyq tájirıbede bul tásil urpaqtan urpaqqa aýyzsha berilip keledi. İlgirge aparylǵan bala birden ońalyp ketedi degen senim el arasynda keń taralǵan. Degenmen, buǵan skeptıkalyq kózqaraspen qaraıtyndar da bar. Alaıda naqty tájirıbeden ótken jandar bul ádistiń tıimdiligine shúbásiz senedi.

Ata-analarǵa berer keńes – balanyń qolyna túsetin ár zatty baqylap, taǵamnyń qabyǵyn arshyp berip, qaýipsizdik sharalaryn saqtaǵan jón. Sondaı-aq, jaqyn mańda ilgir adamnyń bar-joǵynan habardar bolyp júrgen artyq emes.