InfoHub Logo

Álemge áıgili kásipker Ilon Mask jańa "Terafab" jobasyn iske qosatynyn málimdedi. Bul jobanyń basty maqsaty – jylyna trıllıon vatt esepteý qýatyna ıe mıkrosqemder óndirý.

Bul týraly Infohub.kz aqparat agenttigi habarlaıdy.

Masktyń aıtýynsha, bul aýqymdy jobaǵa Tesla, xAI jáne SpaceX kompanıalary birigip atsalysady. Ol bul týraly óziniń X áleýmettik jelisindegi paraqshasynda jazdy.

Jobanyń erekshelikteri

Tesla kompanıasynyń habarlaýynsha, "Terafab" jobasy aıasynda álemdegi eń iri mıkrochıp óndirisi salynady. Bul zaýyt jylyna 1 TVt-qa deıin (shamamen bir trıllıon vatt) esepteý qýatyn bere alatyn bolady. Munda logıkalyq chıpter, jad mıkrosqemalary jáne ozyq býyndaý tehnologıalary bir shańyraq astyna toptastyrylady.

Kompanıa mamandarynyń aıtýynsha, kún energıasyn tıimdi paıdalaný úshin jylyna 100 mıllıon tonnaǵa deıin kún energıasyn jınaý júıelerin kosmosqa shyǵarý qajet. Bul úshin mıllıondaǵan tonna júkterdi orbıtaǵa shyǵarý, kún energıasymen jumys isteıtin jasandy ıntellekti bar spýtnıkter, sondaı-aq ınfraqurylymdy qurýǵa kómektesetin Tesla Optimus robottary qajet bolady. Osynyń bárine mıkrochıpter kerek. Tek Optimus robottaryna 100-200 GVt esepteý qýaty qajet bolsa, jasandy ıntellekti bar spýtnıkter úshin bul kórsetkish tera-vattqa jetedi.

Álemdik óndiristen asyp túsedi

Tesla kompanıasynyń málimetinshe, "Terafab" jobasynyń óndiristik qýaty 2030 jylǵa deıingi álemdegi barlyq mıkrosqem óndirýshileriniń jalpy qýatynan asyp túspek. "Biz "TERAFAB"-ty quryp jatyrmyz. Bul – qazirgi chıp óndirisi men bolashaqtaǵy suranys arasyndaǵy alshaqtyqty joıýǵa baǵyttalǵan qadam. Bolashaq juldyzdar arasynda", - delingen kompanıa habarlamasynda.

Forbes basylymynyń burynǵy málimetterine súıensek, jobanyń quny 25 mıllıard dollarǵa baǵalanǵan. Jylyna 100-200 mıllıard dana jasandy ıntellekt pen jadqa arnalǵan arnaıy chıpter shyǵarý josparlanǵan.