InfoHub Logo

Tanymal telejúrgizýshi Láılá Sultanqyzy áleýmettik jelide ıntımdik sıpattaǵy foto men vıdeolardyń taralýyna qatysty alańdaýshylyq bildirip, jastarǵa mańyzdy eskertý jasady. Ol mundaı materıaldardyń eshqashan mahabbattyń dáleli bola almaıtynyn, kerisinshe, bolashaqta ózderine qarsy qoldanylýy múmkin qaýipti quralǵa aınalýy yqtımal ekenin aıtty.

Bul týraly Infohub.kz aqparat agenttigi habarlaıdy.

Jeke málimetterdiń qaýpi

Sultanqyzynyń aıtýynsha, qazirgi qoǵamda adam týraly jeke málimetterdiń telefonda saqtalýy jáne onyń tarap ketýi úlken qaýip tóndiredi. «Qazirgi tańda eń qaýipti nárse – qarý emes, adam týraly «kompromattyń» telefonda saqtalýy men onyń taratylýy. Jeke shekara, ruqsat, etıka degen uǵymdar joıylyp barady. Buryn «janym» degen adam, keıin ashýymen, haıp úshin nemese abaısyzda sizdiń eń álsiz jerińizge soqqy bere alady», – deıdi ol.

Mahabbat pen manıpýlásıa

Telejúrgizýshi mahabbatqa senýge bolatynyn, biraq óz qaýipsizdikti eshqashan umytpaý kerektigin basa aıtty. «Intımdik foto, vıdeo, paról, jeke hattar – bulardyń eshqaısysy da bireýge dáleldeıtin mahabbat emes. Bul – erteńgi kúni sizdiń ózińizge qarsy qoldanylýy múmkin qural. «Maǵan senbeısiń be?», «Men eshkimge kórsetpeımin», «Biz otbasy bolamyz ǵoı» degen sózderge senip, manıpýlásıa men shantajdyń qurbany bolmańyzdar. Mahabbat dáleldeýdi suramaıdy. Ózińizdi qorǵańyz, ózińizdi syılańyz. Sebebi ınternetke ketken kez kelgen aqparat eshqashan tolyq óshpeıdi», – dep keńes berdi Láılá Sultanqyzy.

Zańdy jaýapkershilik

Sonymen qatar, ol zań talaptaryn da eske saldy. «Bireýdiń ıntımdik foto nemese vıdeosyn ruqsatsyz taratý – qylmys. Mundaı áreketter úshin zań aldynda jaýapkershilik qarastyrylǵan», – dep qorytyndylady ol.