InfoHub Logo

Bıyl jaz aıynda qazaqstandyqtar ıpoteka naryǵyndaǵy jańa ózgeristerge baılanysty baspanaly bolý múmkindigin qaıta qarastyrýda. Shilde aıynan bastap ıpotekalyq nesıeler boıynsha jyldyq tıimdi syıaqy mólsherlemesiniń shekti deńgeıi 25%-dan 20%-ǵa deıin tómendeıdi. Bul ózgeris tek aldaǵy ýaqytta rásimdeletin ıpotekalarǵa qatysty bolady.

Bul týraly Infohub.kz aqparat agenttigi habarlaıdy.

Ipoteka talaptarynyń ózgerýi

Buǵan deıin ıpoteka boıynsha eki túrli stavka belgilengen bolatyn: eger bastapqy jarna 30%-dan assa, mólsherleme 20% bolady, al jarna 30%-dan az bolsa – 25% bolady. Alaıda, bul másele boıynsha túpkilikti sheshim áli jarıalanbaǵan edi. Jańa ereje boıynsha, bankter endi ıpotekalyq nesıeni 20%-dan joǵary mólsherlememen bere almaıdy.

Naryq sarapshylarynyń pikiri

Sarapshylardyń aıtýynsha, mólsherlemelerdiń tómendeýi nesıe berý talaptarynyń qatańdaýymen qatar júredi. Bankter endi tek tólem qabileti joǵary, senimdi qaryz alýshylarmen jumys isteýge basymdyq beredi. Bul ıpotekanyń qoljetimdiligin tómendetýi múmkin. Alaıda, senimdi qaryz alýshylar úshin jaǵdaı jaqsarady, óıtkeni paıyzdyq mólsherlemeler tómendeıdi.

«Ipotekalyq talaptardyń qatańdatylýy, eger ol adamdar kóp qatysatyn ıpotekaǵa qatysty bolsa, árıne, suranysty túsiredi. Bul úı baǵasyn túsiredi dep aıta almasam da, úıdiń qymbattaý qarqynyn toqtatady. Bizde turǵyn úıdiń jyl saıyn 6-7 paıyzǵa nemese ınflásıa deńgeıinde 11-12 paıyzǵa qymbattaý qarqyny bar. Barlyq naryqtaǵy negatıvti ózgerister úıdiń baǵasyn arzandatpaıdy, biraq qymbattaýdy toqtatady. Baǵa da bir orynda qalyp qoıady. Bul stagnasıa dep atalady, sonda ınflásıanyń ósýinen baǵanyń ósýi qalady», – deıdi sarapshy Aıbar Oljaı.

Bastapqy jarnanyń mańyzy

Sarapshylar bastapqy jarnanyń mańyzdylyǵyn atap ótedi. Jarnany jınaı alǵan adam óziniń aqsha jınaý múmkindigin kórsetedi, bul onyń ıpoteka júıesine kirýine jol ashady. Eger adam bastapqy jarnany jınaı almasa, onyń ıpotekany qalaı tóleıtini týraly suraq týyndaıdy. Táýekeli joǵary klıentterge kóbirek prosentpen qymbatyraq nesıe berilýi múmkin, sebebi olardyń kez kelgen ýaqytta tólemeı qalý qaýpi eskeriledi.

Qarjylyq jaǵdaıy turaqty jáne bastapqy jarnasy jetkilikti adamdarǵa úıdi qazir satyp alý tıimdi bolýy múmkin. Al eger qazirgi jaǵdaı múmkindik bermese, ıpoteka aı saıynǵy búdjetke aýyr salmaq salsa, nesıe alý sheshimi durys bolmaýy yqtımal.