InfoHub Logo

Iran Syrtqy ister mınıstri Abbas Arakchı AQSH pen Izraılmen bitimge kelýden bas tartqanyn málimdedi. Onyń aıtýynsha, Tegeran soǵysty toqtatýdy emes, onyń tolyqqandy jáne turaqty aıaqtalýyn qalaıdy.

Bul týraly mınıstr Japonıanyń «Kıodo» agenttigine bergen suhbatynda aıtty. Arakchıdiń sózinshe, Iran qaqtyǵysty túbegeıli sheshýge umtylady.

Sonymen qatar, ol Irannyń Japonıaǵa qatysty kemeleriniń Ormýz buǵazynan ótýine ruqsat berýge daıyn ekenin jetkizdi. Bul másele qazir eki el arasynda talqylanyp jatyr. Irannyń aıtýynsha, Japonıa ımporttaıtyn shıki munaıynyń 90 paıyzdan astamy Taıaý Shyǵystan keledi.

Buǵan deıin Arakchı «Al Jazeera» telearnasyna bergen suhbatynda Irannyń AQSH pen Izraılmen soǵysta sheginbeıtinin aıtqan bolatyn. Ol Irannyń saıası júıesiniń myqty ekenin jáne joǵary laýazymdy tulǵalardyń joǵalýy eldi shaıqaltpaıtynyn atap ótti.

Syrtqy saıası vedomstvo basshysy Irandaǵy ınstıtýttar tulǵalarǵa táýeldi emes ekenin, tipti eń joǵary deńgeıdegi basshy joǵalǵan kúnniń ózinde júıe jumysyn jalǵastyra beretinin basa aıtty.

AQSH pen Izraıldiń Iranǵa qarsy operasıasy 28 aqpanda bastaldy jáne úshinshi aptaǵa aıaq basty. Osy ýaqyt boıy taraptar bir-birine soqqy berip keledi. Tel-Avıvtiń aıtýynsha, olardyń maqsaty – Irannyń ıadrolyq qarý alýyna jol bermeý. Vashıngton eldiń áskerı áleýetin joıýǵa ýáde berip, azamattardy rejımdi qulatýǵa shaqyrdy. Al Iran qorǵanýǵa daıyn ekenin jáne kelissózderdi jańartýdyń mánin kórmeıtinin aıtty.