InfoHub Logo

Kaspıı teńiziniń jaǵalaýynda Iran erekshe formattaǵy áskerı jattyǵý uıymdastyryp, halyqaralyq qaýymdastyqtyń nazaryn aýdardy. Eldiń Mazendaran jáne Gúlstan provınsıalarynda ótken bul sharada Islam revolúsıasy saqshylary korpýsy (KSIR) AQSH pen Izraıl basshylyǵyna qarsy baǵyttalǵan sımvolıkalyq operasıa ótkizdi.

Sahnalanǵan epızodta burynǵy AQSH prezıdenti Donald Tramp pen Izraıl premeri Bınámın Netanáhýǵa uqsas adamdardy arnaıy jasaq sarbazdary “ustap”, olardy “tarıh qoqysy” degen jazýy bar kólikke tastaıdy. Qarý kezelgen sarbazdar men kóngendeı túr tanytqan “tutqyndar” – bul kórinistiń barlyǵy naqty áskerı operasıany emes, saıası astary bar qoıylym ekenin ańǵartady.

Iran mundaı aksıalar arqyly ıdeologıalyq ustanymyn ashyq bildirip keledi. Buǵan deıin de elde AQSH pen Izraıl týyn órteý, osy el basshylarynyń músinderin órtteý sıaqty aksıalar ótkizilgen. Alaıda bul joly kórinis anaǵurlym áserli boldy – áleýmettik jelilerde beınejazbalar jyldam tarap, qyzý pikirtalas týǵyzdy.

Sarapshylar bul áreketti Taıaý Shyǵystaǵy geosaıası oıynnyń bir bóligi retinde baǵalap otyr. Irannyń maqsaty – qarsylastaryna messedj berý ǵana emes, halyqtyń nazaryn ishki máselelerden alshaqtatyp, ulttyq birigý ıdeıasyn kúsheıtý. Qoıylym shyn qaýipke aınalmaıtyn shyǵar, biraq Taıaý Shyǵystaǵy shıelenistiń sımvolıkalyq tilde órbip jatqany anyq.