InfoHub Logo

AQSH-ta turatyn Irannyń sońǵy shahynyń uly Reza Pehlevı, amerıkandyq prezıdent Donald Trampty Irandaǵy jaǵdaıǵa tezirek aralasyp, rejımge qarsy adamdardyń ómirin qutqarýǵa shaqyrdy. Bul týraly DW basylymyna silteme jasaǵan Tengrinews.kz habarlady.

«Iranda kún saıyn odan da kóp ırandyqtar ólip jatyr», - dedi Pehlevı senbi kúni Múnhen qaýipsizdik konferensıasynda narazylyq bildirýshilerge jasalǵan qatygezdik týraly aıta kele.

Onyń aıtýynsha, Tegerandaǵy úkimetti tezirek qulatý – basty maqsat, óıtkeni qazirgi basshylyq ýaqytty sozdyrý úshin kelissózderdi paıdalanyp otyr.

«Sizder úlken áskerdi jumyldyryp, zorlyq-zombylyqtyń ýaqyty aıaqtalyp kele jatqanyn aıqyn kórsettińizder», - dedi Pehlevı AQSH prezıdentine jáne ırandyq narazylar Trampty estigenin jáne oǵan sengenin aıtty.

Onyń sózine qaraǵanda, Tramp eger sheshýshi áskerı áreketterge barsa, álemniń eń uly batyrlarynyń biri retinde tanyla alar edi.

«Adamdar áli de qarsylyq kórsetýde. Ókinishke oraı, rejım túrmege jabý naýqanyn jalǵastyrýda», - dedi ol, demonstranttardyń kóshege qaıta shyǵý úshin shetelden qoldaý qajet ekenin aıtty.

«Islam respýblıkasyn toqtatýdyń ýaqyty keldi. Bul talapty óz eliniń qanyn tókken, bizden rejımdi túzetýdi emes, ony jerleýge kómektesýdi suraǵan otandastarym aıtyp jatyr», - dedi sońǵy ırandyq shahtyń uly.

62-shi Múnhen qaýipsizdik konferensıasy Bavarıa astanasynda 13-15 aqpan aralyǵynda ótti. Konferensıaǵa 60-tan astam memleket jáne úkimet basshylary, shamamen 100 eldiń qorǵanys mınıstrleri qatysty.

Juma kúni, 13 aqpanda, AQSH ákimshiliginiń eki ókili Reuters agenttigine AQSH áskerıleri Iranǵa qarsy birneshe aptaǵa sozylýy múmkin operasıaǵa daıyndyq júrgizip jatqanyn habarlady. Josparlaý Tramptyń Islam respýblıkasynda bılikti aýystyrý nıeti týraly málimdemesinen keıin kúsheıdi.

Aq úı buǵan deıin Taıaý Shyǵysqa ekinshi avıatasymaldaýshy kemesin, sondaı-aq joıǵysh ushaqtardy, esmınesterdi jáne myńdaǵan áskerı qyzmetkerlerdi jibergenin habarlady. Tramp juma kúni Tegerandy eskertip, ıadrolyq kelisim boıynsha kelissózder sátsiz aıaqtalsa, el úshin «jaman kún bolatynyn» aıtty.