InfoHub Logo

Qazaqstandyq tanymal bloger Kaısar Kamza Vetnamda ustalyp, halyqaralyq izdeýdegi isi boıynsha tergeýge alyndy. Bul týraly Qazaqstan İshki ister mınıstrligi málimdedi.

Bul týraly Infohub.kz aqparat agenttigi habarlaıdy.

İstiń mán-jaıy

Vedomstvonyń habarlaýynsha, blogerdi Interpol arnalary boıynsha, qazaqstandyq jáne vetnamdyq quqyq qorǵaý organdarynyń ózara is-qımyly nátıjesinde Kamran qalasynda ustaǵan. İshki ister mınıstrliginiń málimetinshe, Kamza zańsyz oıyn bıznesin uıymdastyrǵany úshin halyqaralyq izdeýde bolǵan.

Tergeý nusqasy boıynsha, bloger óziniń áleýmettik jelilerin onlaın-kazıno jarnamalaý úshin júıeli túrde paıdalanǵan. İİM málimetinshe, bul tek jarnama ornalastyrýmen shektelmeı, aýdıtorıany qumar oıyndarǵa tartýdy da qamtyǵan.

Mınıstrlik málimetinshe, blogerdiń zańsyz áreketinen alǵan tabysy 100 mıllıon teńgeden asqan. Aqsha onyń atyna tirkelgen krıptovalúta ámıanyna aýdarylǵan.

Qazirgi ýaqytta ustalǵan azamatty elge ekstradısıalaý máselesi sheshilip jatyr.

Buǵan deıin ne bolǵan?

Esterińizge sala keteıik, qańtar aıynda quqyqtyq statısıka jáne arnaıy esepke alý portalynda bloger Kaısar Kamzaǵa qatysty izdeý jarıalanǵan bolatyn. İzdeýdi Qarjylyq monıtorıń agenttigi bastamashylyq etken. İzdestirý sharalaryn Astana qalasy boıynsha Ekonomıkalyq tergeý departamenti júrgizgen. Resmı aqparatqa sáıkes, izdeý isi 2026 jylǵy 10 qańtarda tirkelgen.

Keıinnen blogerdiń zańsyz oıyn qyzmetine kómekteskeni úshin kúdiktelgeni belgili boldy. Qarjylyq monıtorıń agenttiginiń málimetinshe, Kaısar Kamza bes jyl boıy Instagram jelisinde «qais_arr» esimimen belsendi blogerlik qyzmet júrgizip, onyń 2,4 mıllıonǵa jýyq jazylýshysy bolǵan. Sondaı-aq, ol «Qora enterteınment» atty jabyq Telegram arnasyn basqarǵan, onyń aýdıtorıasy shamamen 368 myń adamdy quraǵan.

Agenttik málimetinshe, Kamza Q.B. óziniń áleýmettik jelilerdegi jeke akkaýnttaryn paıdalanyp, qazaqstandyqtarǵa arnalǵan Pinco saıtyndaǵy qumar oıyndarǵa tirkelýge jáne qatysýǵa shaqyratyn jarnamalyq beınematerıaldar men jazbalardy júıeli túrde ornalastyrǵan. Beınerolıkterdiń astyna bonýstar beretin jeke promokodyn qosqan.

Kaısar Kamza kim?

Kaısar Kamza – qazaqstandyq ınflúenser. Onyń Instagram paraqshasyna shamamen 2,4 mıllıon adam jazylǵan. Ol óziniń ómir saltyn, shetelde túsirilgen beınerolıkterin kórsetý arqyly keń tanymaldylyqqa ıe boldy.

Buǵan deıin bloger memlekettik organdardyń nazaryna ilikken. Ol jarnama týraly zańnamany buzǵany, sonyń ishinde zańsyz utys oıyndaryn ótkizip, onlaın-kazınony nasıhattaǵany úshin ákimshilik jaýapkershilikke tartylǵan. Bir jaǵdaıda aıyppul 1,17 mıllıon teńge boldy. Soǵan qaramastan, onyń akkaýntynyń stıli men mazmuny retteýshilerdiń baǵalaýy boıynsha aıtarlyqtaı ózgermegen.

Sondaı-aq, Kamzanyń Úndistanǵa sapary kezinde túsirgen vıdeosy qoǵamda úlken rezonans týdyrdy. Kadrlarda bloger jergilikti turǵyndarǵa qatysty dóreki sózder qoldanyp, agressıvti minez-qulyq tanytty. Keıinnen Qazaqstan Syrtqy ister mınıstrligi úndi bıliginen quqyq buzýshylyqtar týraly resmı habarlamalar kelmegenin habarlady, biraq shetelde mundaı minez-qulyq úshin jaýapkershilik týraly eskertti.