InfoHub Logo

Bir kúni attyń ústinde ketip bara jatqan kisi bulaqtyń basynda uıyqtap jatqan adamnyń aýzyna kishkentaı jylan kirip ketkenin kóredi. Attaǵy kisi uıyqtap jatqan adamdy qamshysymen uryp-uryp oıatady. Aǵashtyń túbinde shirigen almalar bar edi. Atynan túsip oıanǵan kisige qamshysymen nusqap «Myna almalardy je!» dep ámir etedi. Ol taıaq jeýden qorqyp, almalardy kóp jegeni sonshalyq, jegen almalary aýzynan shyǵa bastaıdy. Keıin attaǵy kisige: «Eı jolaýshy! Ne úshin eshbir sebepsiz maǵan shirigen almalardy jegizip, zulymdyq ettiń? Saǵan kezikken kúnim qurysyn, netken baqytsyzdyq. Eshbir jazyqsyz, tipti dinsiz adamǵa da mundaı azap berilmeıdi ǵoı» deıdi.

Onyń bul sózderine mán bermeı, ony artynan qýalap, júgirte bastaıdy. Ol aǵyl-tegil jylaǵan kúıde júgire beredi. Sońynda júregi aınyp, ishindegilerdiń barlyǵyn qusyp shyǵarady. Sol kezde álgi jylan da syrtqa shyǵady. İshinen shyqqan jylandy kórgen kezde qatty qorqyp, keıin ne úshin shirigen almany jegizgenin túsinedi. Qınalyp, azap shekkenin sol mezette-aq umytyp, álgi kisige: «Eı jolaýshy! Sen danyshpan adam ekensiń. Sen Allahý ta’alanyń maǵan jibergen rahmetisiń (meıirimisiń). Meni ólimnen qutqardyń. Sen meni meıirimdi anadaı qutqarýǵa tyrysqan kezde, men senen arystannan qashqandaı qashyppyn. Seni kórgen, senimen tanysqan adam qandaı baqytty adam. Saǵan janym pıda bolsyn! Men aýyr sózder aıttym. Eı myrza! Eı shahtardyń shahy! Saǵan aıtqan jaman sózderimniń barlyǵy bilimimniń joqtyǵynan. Eger jaǵdaıdy túsingenimde, saǵan jaman sózder aıtpas edim. Eı kórkem minezdi, eı dana minezdi kisi! Orynsyz, qate aıtqan sózderim úshin keshirim suraımyn, meni keshir!»- deıdi. Attaǵy kisi bylaı dep jaýap beredi: «Eger saǵan ishińe jylan kirdi dep aıtqanymda, seni jylannyń ýynan buryn qorqynysh óltirer edi». (Másnáýıden)

Osy taqyrypta súıikti paıǵambarymyz bylaı degen:

«İshterińdegi jasyryn dushpandy aıtqanymda, jigitterdiń óti atylyp, aqyldylardyń aqyly qurıtyn edi. Kóńilderińmen duǵa etip jalynýǵa, ne oraza tutýǵa, ne namaz oqýǵa kúsh-qýat taba almas edińder».

---