InfoHub Logo

ALMATY. QazAqparat. Qazaqstan İshki ister mınıstrligi (İİM) azamattardyń Android smartfondaryna zıandy baǵdarlamalar arqyly qol jetkizýge baǵyttalǵan jańa alaıaqtyq sqema týraly eskertti. Bul týraly Polisia.kz saıtyna silteme jasap Tengrinews.kz habarlady.

Alaıaqtar ártúrli ádisterdi qoldanady. Olar messendjerler men áleýmettik jeliler arqyly fıshıng siltemelerin jiberýi, jalǵan mobıldi qosymshalardy tarataý nemese foto, vıdeo, qujattardy jeleý etip, zıandy faıldardy taratýy múmkin.

Sonymen qatar, qylmyskerler memlekettik organdar, bankter nemese jetkizý qyzmetteri atynan habarlamalar joldap, tipti telefon soǵyp, túrli uıymdardyń qyzmetkeri bolyp kórinip, aksıalarǵa nemese utys oıyndaryna qatysýdy jeleý etip, qosymshany ornatýǵa kóndiredi.

Mundaı baǵdarlama ornatylǵannan keıin, qylmyskerler qurylǵyǵa qashyqtan qol jetkize alady. Bul óz kezeginde bank shottarynan aqsha urlaýǵa, onlaın nesıeler rásimdeýge, jeke derekter men hat-habarlardyń qupıalylyǵyn buzýǵa, tipti telefondy buǵattap, bopsalaýǵa ákelýi yqtımal.

Ózińizdi qalaı qorǵaýǵa bolady?

Vedomstvo mamandary úshinshi tulǵalardyń ótinishi boıynsha qosymshalardy ornatpaýǵa, SMS habarlamalarynan kelgen kodtardy eshkimge habarlamaýǵa jáne kúmándi siltemelerge kirmeýge keńes beredi.

Sondaı-aq, qosymshalardyń surap otyrǵan ruqsattaryn muqıat tekserip, antıvırýstyq baǵdarlamalardy qoldaný jáne bank operasıalary týraly habarlamalardy qosý qajet.

Qurylǵynyń zaqymdalǵanyn qalaı anyqtaýǵa bolady?

Mamandar qurylǵynyń batareıasynyń tez taýsylýy, qyzyp ketýi jáne belgisiz qosymshalardyń paıda bolýy sıaqty belgilerdi atap ótti.

Eger qurylǵynyń zaqymdalǵanyna kúdik týyndasa, dereý ınternetti óshirip, bankke habarlasyp, quqyq qorǵaý organdaryna júginý qajet.