InfoHub Logo

Izraıl Birikken Arab Ámirlikterine (BAÁ) áýe shabýylynan qorǵaıtyn "Temir qalqan" júıesin jáne ony paıdalanatyn áskerı qyzmetkerlerdi Iranmen soǵys bastalǵan kezde jibergen. Bul týraly Axios basylymy eki ızraıldik jáne bir amerıkandyq sheneýnikke silteme jasap habarlady.

Bul BAÁ-ge AQSH pen Izraılden tys jerde "Temir qalqan" júıesiniń ornalastyrylýynyń alǵashqy jaǵdaıy. Basylymnyń málimetinshe, bul júıe ondaǵan ırandyq zymyrandardy joıyp, Izraıl men BAÁ arasyndaǵy áskerı jáne barlaý yntymaqtastyǵyn jańa deńgeıge kótergen.

BAÁ Qorǵanys mınıstrliginiń habarlaýynsha, Iran tarapynan elge shamamen 550 balıstıkalyq jáne qanatty zymyran, sondaı-aq 2200-den astam ushqyshsyz apparat ushyrylǵan. Olardyń kópshiligi joıylǵanymen, keıbiri áskerı jáne azamattyq nysandarǵa soqqy bergen.

Izraıldik resmı tulǵalardyń málimetinshe, premer-mınıstr Bınámın Netanáhý BAÁ prezıdenti Muhammed bın Zaıdpen telefon arqyly sóıleskennen keıin, elge "Temir qalqan" batareıasyn, oq-dárilerdi jáne birneshe ondaǵan SAHAL operatorlaryn jiberýdi tapsyrǵan.

Izraıl áskerıleri sondaı-aq Irannyń ońtústigindegi shaǵyn qashyqtyqtaǵy zymyrandardy BAÁ men Parsy shyǵanaǵyndaǵy basqa elderge ushyrylmaı turyp joıǵanyn málimdedi. Degenmen, Netanáhýdyń ózi Izraılge shabýyl jasalǵan sátte áýe shabýylynan qorǵanys júıesin bólisý týraly sheshimi el ishinde narazylyq týdyrýy múmkin dep jazady basylym.

Izraıl men BAÁ arasyndaǵy qarym-qatynas, sonyń ishinde Gaza máselesi boıynsha kelispeýshilikterge qaramastan, eki eldiń resmı tulǵalary seriktestiktiń tarıhı deńgeıde ekenin aıtady. BAÁ aýqymdy shabýyldar kezinde odaqtastarynan qoldaý suraǵan.

"Biz muny umytpaımyz", - dedi BAÁ-niń joǵary laýazymdy sheneýnigi Izraıl men Netanáhýdyń mańyzdy sátte kórsetken kómegi týraly aıta otyryp.

BAÁ ókili AQSH, Fransıa, Ulybrıtanıa, Italıa jáne Avstralıa sıaqty basqa seriktesterdiń de úlesin atap ótti.

Buǵan deıin AQSH prezıdenti Donald Tramp Irannyń munaı ınfraqurylymyna shabýyl jasaýǵa úsh kún ýaqyty bar ekenin málimdegen bolatyn.