InfoHub Logo

Parakarateshi Jetes Nurmaǵanbetov Astana qalalyq karate federasıasynyń basshylyǵy tarapynan qysym kórgenin aıtyp, quzyrly organdardan ádilet surap otyr. Onyń aıtýynsha, bir jyldan astam ýaqyt boıy onyń jalaqysynan aı saıyn 50 myń teńgeden aýdarylyp kelgen.

Bul týraly Infohub.kz aqparat agenttigi habarlaıdy.

Sportshynyń aıtqany

38 jastaǵy Jetes Nurmaǵanbetov – birinshi toptaǵy múgedek. Serebraldy sal aýrýyna shaldyqqan sportshy 2021 jyldan beri parakaratemen aınalysyp keledi. Ol 2022 jyly jumysqa ornalasqanda, jalaqysy 102 myńnan 120 myń teńgege deıin óskenin aıtady. Alaıda, sol kezden bastap aı saıyn 50 myń teńgeni belgili bir adamdardyń Kaspi Gold nómirlerine aýdaryp otyrǵan.

Bastapqyda bul qarajat muqtaj jandarǵa, atap aıtqanda, jalǵyzbasty analar men kópbalaly otbasylarǵa kómek retinde beriledi degen túsinik bolǵan. Alaıda, sportshy ıpoteka alǵannan keıin bul talaptyń zańdylyǵyna kúmándanyp, aýdarymdy toqtatqysy kelgende, oǵan qysym kórsetilgenin jetkizdi.

«Ipoteka tólep otyrǵan adamǵa bul ońaı emes. Aqsha aýdarýdy toqtatatynymdy aıtqanda, “jumystan shyq” dedi», – deıdi Nurmaǵanbetov.

Resmı aryz jáne jaýap

2026 jyldyń qańtarynda Jetes Nurmaǵanbetov e-Ótinish arqyly resmı aryz jazǵan. Onyń aıtýynsha, on kún ótken soń federasıa ókili úıine kelip, keshirim surap, 1 mln 150 myń teńgeni qolma-qol qaıtarmaq bolǵan. Alaıda, sportshy bul aqshany almaǵanyn aıtady.

Nurmaǵanbetovtiń sózinshe, ózi sıaqty taǵy shamamen 10 adam osyndaı jaǵdaıǵa tap bolǵan. Sportshy bul másele boıynsha prokýratýraǵa, polısıaǵa jáne UQK departamentine shaǵymdanǵan. Alaıda, onyń advokaty Dastan Igýbaevtyń aıtýynsha, is áli kúnge deıin tolyqqandy qaralmaı, «qylmystyq quram joq» degen syltaýmen qaıta-qaıta toqtatylyp jatyr.

Federasıa ókiliniń jaýaby

Atalǵan aıyptaýlarǵa qatysty WKF karateden Astana qalalyq federasıasynyń vıse-prezıdenti Meıramgúl Dýkýeva barlyq málimdemelerdi joqqa shyǵardy. Ol muny jala jabý dep atap, buǵan deıin de mundaı aryzdar bolǵanyn, biraq eshqaısysy dáleldenbegenin aıtty. «Qalasa, taǵy da sotqa júginsin», – dedi Dýkýeva.

Bul máselege baılanysty QR Týrızm jáne sport mınıstrligine resmı saýal joldandy.