InfoHub Logo

Jambyl oblysynda tabıǵattyń tosyn minezi saldarynan tótenshe jaǵdaı rejımi engizildi. Qatty jelden bolǵan zardaptardy baǵalaý jáne zaqymdalǵan nysandardyń jaı-kúıin tekserý úshin oblys ákiminiń birinshi orynbasary Nurjan Kálenderov oqıǵa ornyna bardy.

Bul týraly Infohub.kz aqparat agenttigi habarlaıdy.

Tabıǵı apattyń saldary

Aqparatqa súıensek, 21 aqpanda Jambyl oblysynyń birneshe eldi mekenin qamtyǵan qatty jel saldarynan úıler men áleýmettik nysandar zaqymdalǵan. T. Rysqulov aýdanynda jel 29 nysannyń shatyryn julyp áketken, onyń 10-y áleýmettik mekemeler. 19 eldi mekende elektr qýaty ýaqytsha toqtatylyp, jeti eldi mekende gazben jabdyqtaý da qıyndyq týdyrǵan. Merki aýdanynda da 27 turǵyn úıdiń shatyry men bes mekteptiń qasbeti zaqymdaldy. Segiz eldi meken elektrsiz qalsa, úsh eldi mekende gaz jelileri zardap shekken. Qazirgi ýaqytta qurbandar men zardap shekkender týraly aqparat joq.

Qalpyna keltirý jumystary

Oblys ákiminiń birinshi orynbasary Nurjan Kálenderov jedel shtabtyń otyrysyn ótkizip, naqty tapsyrmalar berdi. Onyń ishinde elektr jáne gazben jabdyqtaýdy basymdyqpen qalpyna keltirý, qulaǵan aǵashtar men zaqymdalǵan qurylystardy tazartý, mektepterde balalardyń qaýipsizdigin qamtamasyz etý jáne jumystardy sapaly ári ýaqytyly aıaqtaý mindetteldi. T. Rysqulov aýdanynda birqatar nysandarda jergilikti tótenshe jaǵdaı jarıalandy. Keltirilgen shyǵynnyń kólemin anyqtaý jumystary jalǵasýda. Elektr jáne gazben jabdyqtaýdy qalpyna keltirý úshin 10 brıgada jumyldyrylyp, jóndeý jumystary máresine jaqyndap qaldy.

«Jaǵdaı oblys ákiminiń jeke baqylaýynda, al turǵyndar komýnaldyq qyzmetterdiń tolyq qoldaýyna sene alady», - dep habarlady Jambyl oblysy ákiminiń baspasóz qyzmeti.