InfoHub Logo

Bul qarapaıym áreketter bir kúnderi sizdiń ómirińizdi qutqaryp qalýy múmkin.

Árkimniń qaqalyp qalýy múmkin. Ol kezde jaqyn mańda eshkim bolmaı qalsa, munyń arty qaıǵyly aıaqtalýy ǵajap emes. Sondyqtan mundaı kezde ózińizge qalaı kómektesý keregin bilip júrgenińiz abzal.

Eń bastysy — qatty úreılenbeı, ne isteý keregin naqty túsiný kerek.

Joǵarǵy tynys alý joldarynyń bógde zatpen bitelip qalýy jartylaı nemese tolyq bolýy múmkin.

Jartylaı bitelgen kezde adam qıyn bolsa da tynys alyp, jótelip, sóıleı alady. Al tolyq bitelgende ol múmkin emes. Mundaı jaǵdaıda adam tamaǵyn qysyp ustap, qoldary qaltyraı bastaıdy.

Shashalyp qalsańyz, ne isteýińiz kerek

Eń áýeli, tynyshtalýǵa tyrysyńyz. Úreı ózińizge kómektesý úshin oıyńyzdy jınaqtaýǵa múmkindik bermeıdi, tek jaǵdaıdy ýshyqtyryp jiberedi.

Barynsha qatty jótelýge tyrysyńyz: bul bizdiń negizgi tabıǵı qorǵanysymyz. Jóteldi kúsheıtý úshin búgilýge bolady. Mundaı kezde qursaq bulshyqeti kómektesedi.

Qandaı jaǵdaı bolmasyn, jóteldi basýǵa tyryspańyz. Bul jaǵdaıdy qıyndatyp jiberedi.

Eger janyńyzda aına bolsa, sony qoldanyńyz: aýzyńyzdy ashyp, tilińizdi jaǵyńyzǵa qaraı qolyńyzben tómen basyńyz da, ony joǵary kóterip jáne azdap alǵa tartyńyz. Bul kórýdi jaqsartady. Eger bógde zatty kórseńiz, ony saýsaǵyńyzdy árli-berli qozǵaltý arqyly ornynan qozǵaltýǵa tyrysyp, alyp tastańyz. 

Tamaqqa turyp qalǵan zatty eki saýsaqpen ustap alýǵa tyryspańyz. Olaı isteseńiz siz ony ári qaraı ıterip, jaǵdaıdy qıyndatyp jiberýińiz múmkin.

Tunshyǵyp bara jatsańyz ne isteý kerek

Mundaı jaǵdaıdy adamnyń ózine kómektesýine bir jarym mınýttaı ǵana ýaqyty bar. Sodan keıin adamdardyń kópshiligi esinen tanyp, aman qalý múmkindiginen aıyrylyp qalady.

1. Qatty ensiz zatty qoldanyńyz

Bul oryndyqtyń arqalyǵy (dóńgelekti oryndyq emes), vanannyń jaqtaýy sıaqty zattar bolýy múmkin. Eń bastysy asylyp tura alatyndaı bolýyńyz kerek.

İshińizdiń joǵarǵy jaǵy tańdap alǵan zatyńyzdyń qatty jaqtaýyna tirelip turatyndaı eńkeıińiz. Aıaǵyńyzdy bos ustap, álgi zatqa tez asyla ketińiz. İshke túsken qysym dıafragma arqyly ókpege beriledi. Bul bógde zatty syrtqa ıterip shyǵarýǵa múmkindik beredi. Bul ádis qutqarýshylar tájirıbesinde eń nátıjeli bolyp esepteledi.

2. Geımlıh ádisin qoldanyńyz

Bir qolyńyzdyń judyryǵyn túıińiz. Judyryǵyńyzdyń bas barmaǵyn kindigińizden 2-3 santımetr joǵary ishińizge tirep turyńyz. Judyryqty ekinshi qolyńyzben qysyp ustap, barmaǵyńyzben ishińizdi jáne  joǵary baǵyttap bes ret qatty-qatty qysyp jiberińiz.

Kúshtiń túsý núktesiniń jaısyzdyǵynan jáne qaqalǵan adamnyń aýa jetpegendikten álsirep qalýynan bul ádisti óte senimdi dep eseptemeıdi. Geımlıh ádisin janyndaǵy adamnyń jasaǵany jaqsy nátıje beredi. 

3. Edenge qulap túsińiz

Tizerlep turyp, qolyńyzdy búkpeı edenge súıenińiz. Qolyńyzdy eki jaqqa tez jaıyp jiberińiz de, keýdeńizben edenge qulap túsińiz. Soqqy ókpedegi qysymdy arttyryp, bógde zat tynys alý joldarynan syrtqa ushyp shyǵýy múmkin.

Negizi bul ádis tek teorıa júzinde aıtylady. Ony baıqap kórýge bola ma, joq pa – belgisiz.

Shashalyp qalmaý úshin qalaı tamaqtaný kerek

— Asty azdan tistep, ábden shaınańyz. Mundaı jaǵdaıda shashalyp qalý qaýpi aıtarlyqtaı tómendeıdi.

— Janyńyzda tamaqtan soń ishý úshin shyryn, sút, salqyn shaı sıaqty sýsyndar bolsyn.

— Eń bastysy — asyqpańyz. Júrip bara jatyp tamaqtanbańyz: bul basqa nársege nazaryńyzdy aýdartyp, tamaqtyń kishkentaı keseginiń ózine qaqalyp qalýyńyz múmkin. Al eger otyrýǵa ýaqytyńyz bolmasa, onda tereń tynys alyp, tamaqty asyqpaı jeýge tyrysyńyz.

Dámdi taǵamdy asyqpaı dámin alyp jeý — ózińizdi jaısyz jaǵdaıdan qorǵaýdyń jaqsy ádisi.

---