InfoHub Logo

Qoǵam belsendisi Nurjan Joldybekuly, bilim salasy mamandarynyń memleket basshysy Qasym-Jomart Toqaevqa joldaǵan ashyq hatyna qatysty alańdaýshylyq bildirdi. Ol muǵalimderdiń ákimdikterdiń aýdandyq bilim bólimderin berý týraly zań normasyna qarsy shyqqan áreketin synǵa alyp, olarǵa eskertý jasaýdy, al eskertýge qulaq aspasa, qylmystyq is qozǵaýdy usyndy.

Bul týraly Infohub.kz aqparat agenttigi habarlaıdy.

Muǵalimderdiń úndeýine alańdaýshylyq

Bilim salasynyń mamandary ótken aptada depýtattardyń «Aýdandyq bilim bólimderin ákimdikterge berý» týraly zań normasyna qatysty qarsylyqtaryn bildirip, máselege Prezıdenttiń aralasýyn suraǵan bolatyn. Alaıda, Nurjan Joldybekuly bul úndeýdi qoǵamnyń birtutastyǵyna qaýip tóndirýi múmkin dep esepteıdi.

«Qoǵamnan bólinip bara jatqan joq pa?»

«Muǵalimder qaýymy – dinı sektalar sekildi, qoǵamnan bólinip bara jatqan joq pa? Ózderin muǵalim sanaıtyn alqaly top Prezıdent atyna kúlli muǵalimder atynan bek úndeý jarıalap, májilis depýtattarynyń «aýdandyq bilim salasy búdjetin aýdan ákimshiligine qaıtarý» sheshimine qarsy – «muǵalim qoljaýlyq emes» degen negizsiz uran aıtyp – shyrǵalań týǵyzýda», – deıdi ol.

Qoǵam belsendisi bul máselege QR Bas prokýratýrasy baǵa berýi tıis ekenin aıtyp, áreketteri toqtamasa, qylmystyq is qozǵaý qajettigin alǵa tartty. Onyń pikirinshe, ár salany «odeıalony ózine tartýy» memlekettiń ydyraýyna aparatyn jol.

Qoǵamdaǵy pikirtalas

Nurjan Joldybekulynyń bul jazbasy áleýmettik jelide qyzý talqylanyp, ártúrli pikirler týdyrdy. «Zıatker ustaz» qoǵamdyq birlestiginiń tóraǵasy Ómir Shynybekuly «Qaırat 37 jyl» dep jazsa, jeli qoldanýshysy Esbolat Ómirzaq: «Muǵalimderdi qoǵamnan bólinip, dinı sektalar sıaqty bolyp ketti deısiz be?! Budan artyq soraqylyqty kórmedim! 37-jyl qusatyp, «halyq jaýlaryn» izdep ketken sıaqtysyz ǵoı!» dep pikir bildirgen.