InfoHub Logo

(Murat Dúısenbaıuly Rahmetovke)

...Siz jaıly jyr jazbaq

Oı, sirá, joq edi,

Kenetten jyr mazdaq

Alaýlaı jóneldi.

Oı táńir, terbegen

Aıdynǵa burqanǵan,

Salyp men otyrmyn

Jyr atty kemeni.

 

                  1

Ýaqyt aýmaly-tókpeli,

(Keı pende táńirge ókpeli)

Keshigip meıirim kóktemi,

Qyrsyqtyń qursaýlap kók seńi.

Janymdy

Alapat muz qyraý qursaǵan,

Kóńilim rıza bir saǵan.

Tanytyp eldikti,

Shart túıip beldikti,

Túrgizgen bilekti.

Qajyr men qaıratyn jumsaǵan,

Berdi aǵa jemisin.

Ózińdi

 Taný uǵyný men  úshin

Ońaıǵa soqpaǵan...

Beımaza turqyńdy,

Baǵamdap syrtyńdy,

İshińe úńilmeı,

(Kúlkili bir túrli)

Jasappyn oı-túıin.

Bıletpeı yrqyńdy,

Buzdyrmaı shyrqyńdy,

Torǵaıdaı shyryldap,

Qorǵaǵan jurtyńdy,

Kezeńde tym qıyn.

Janyńdy kesh uqtym,

Jaltaqtap jasyrman.

Aıyrý qıqymdy

Aıyrý asyldan,

Aýyry bul júktiń.

                       

        2

...Jaqpar, jaqpar tastarda,

Jasyrynǵan sulýlyqty kim uqqan.

(Sulýlyqqa tur eken-aý tunyp mań)

Qara tasta qasıet baryn sezinbeı,

Kázzaptardyń qunyqqan,

Talqandaǵan jaqpar-jaqpar tastardy.

Qolyn qaǵý qaperge de kirmegen,

Ý ishedi bilmegen.

Qazynany kóz aldynda talatý,

Bolyp shyqty-aý bul degen.

                         

      3

Qara tastan

Qora –qopsy qalaǵan,

Alamandar qasqyrdaıyn talaǵan.

Ústi-ústine jatty tasty tilgilep,

Qansyraǵan tánge túsken jaradan.

Dala jatty azaly únge tunshyǵyp,

Kókjıekke kóterilgen kún shyǵyp.

Qara tastan

Qara qandy aqqan saýlap sýdaıyn,

Kórgen sátte kirdi bultqa bulqynyp.

Kóp uzamaı janarynan jas tamyp,

Aza jańbyr

Azan-qazan kete bardy bastalyp.

Tabanǵa sap kózsiz kezeń el ardaǵyn taptaǵan,

Kete barǵan shash ornyna basty alyp.

Ótti aqyry san taǵdyrǵa

Ý soıqy izin qaldyryp.

Qandy tyrnaq bosatqanda sheńgelin,

Senseń, aǵa, seń soqqandaı sendeldim.

Qýanyshym kókiregime ystyq jas bop quıylyp,

Tilegine tilek qostym men de eldiń.

                       

       4

Qara tasyn

Bizder týǵan myna baıtaq dalanyń,

Perzentine jer-ananyń baladym.

Quz jartastar minezdegi órligim,

Shyńdar anaý qıandarǵa

Qadalatyn janarym.

Sodan ba eken,

Shyń-quzdardy alys júrsem saǵynam.

Qara tasy –boıtumarym,

Ózge jurttyń aq mármárin ne qylam.

Qara tasym kúı terbetip aldymnan,

Turǵandaıyn árqaısysy salyp án.

                    

      5

Qara tasqa

Músinshiniń syryn shertse shapqysy,

Beze qashpaı

Shyńylyna shydaıdy eken shaq kisi.

Jansyz tasty qyrnap, jonyp, bir qalypqa keltirgen,

Has sheberdiń ańsaı kútken baq qusy.

Tóbesinde sáti me eken qalyqtaǵan bul, sirá,

Shombal tasty balshyqsha ılep kóndirgen de yrqyna.

Mańdaıynan monshaq-monshaq ter saýlap,

Músinshiniń turqyna súısindi jurt.

Syrt baqylap uzaq turdym qasynda,

Jumbaq músin syr symbaty ashyla...

Buqar jyraý babam bolyp, o táýba!

Oralǵan ba týǵan jerge asyǵa.

Degen oıǵa pendelikpen berilgem,

Senseń , aǵa, kóz aldyma kerilgen,

Baıtaq dala áýlıege táýáp qyp,

Shyń-quzdarym bas ıgendeı kóringen.   

---