InfoHub Logo

Qazaq estradasynyń tanymal ánshisi Maqpal Júnisova óziniń burynǵy jary, belgili saıasatker Zamanbek Nurqadilovpen qarym-qatynasynyń qalaı bastalǵany týraly tyń derekterdi jarıalady. Ánshiniń aıtýynsha, ol alǵashqyda Zamanbek Nurqadilovti jaqsy kórmegenin jáne tipti odan seskengenin jetkizdi.

Bul týraly Infohub.kz aqparat agenttigi habarlaıdy.

Qarym-qatynastyń bastalýy

Maqpal Júnisova bul týraly 2024 jyly «Din Dina Show» baǵdarlamasynda suhbat bergende aıtty. Ánshiniń sózinshe, Zamanbek Nurqadilovtiń ózine degen yqylasynan keıin, qarym-qatynasty bastaýǵa ol ózi usynys jasaǵan.

«Men ol kisiniń esigin qaǵyp, «Meni alshy» dep jalynǵan joqpyn. Tipti ol kisige ǵashyq ta bolmaǵanmyn. Jaqsy da kórgen joqpyn. Zákeń ózi degenin jasap, qalaýyn oryndady. Qolynda bıligi boldy, aınalasynda biz qorqatyn adamdar bar edi. Alǵashqyda odan seskenetinbiz. Keıin syılastyq ornady», - dep eske aldy óner ıesi.

Neke jáne otbasy

Ánshi Zamanbek Nurqadilovpen nekeleriniń zańdy túrde birden tirkelmegenin de aıtyp ótti. Olar 1991 jyly birge tura bastaǵanymen, resmı nekege tek 1998 jyly ǵana otyrǵan. Maqpal Júnisova qıyn sátterde jarynyń janynda qalý sebebin de túsindirdi.

«Ekeýmiz de ákesiz óstik. Ol da men sıaqty qaıyrshy bolatyn. Bılik te, baılyq ta qoldan ketti. Men Zákeńdi ustaǵym kelse, birden AHAJ bólimine barar edim. Biraq men barmaı qoıdym. Jaqsy kórseńiz, qujatsyz turamyz dedim. 1991 jyly shańyraq kóterdik, 1998 jyly zańdy nekege turdyq. Ol ýaqytqa deıin ketetin erkek ketip qalar edi. Biraq ol kisi qaıtpaı qoıdy. Men onyń jolyn baılaǵan joqpyn», - dedi halyq ártisi.

Maqpal Júnisova týraly

Maqpal Júnisova – qazaq estradasynyń damýyna eleýli úles qosqan, ózindik daýsymen jáne oryndaýshylyq mánerimen halyqtyń súıispenshiligine bólengen tulǵa. Ol 1963 jyly Qaraǵandy oblysynda dúnıege kelgen. Kásibı sahnadaǵy jolyn 1981 jyly «Qazaqkonsert» birlestiginde bastap, kóp uzamaı tanymal boldy. Ánshi nebári 22 jasynda «Qazaqstannyń eńbek sińirgen ártisi», al 31 jasynda «Qazaqstannyń Halyq ártisi» ataǵyn aldy. Ol tek ánshilik qyrymen ǵana emes, ustazdyq qyzmetimen de tanymal.