InfoHub Logo

Jasandy ıntellekt (JI) arqyly jasalǵan kontenttiń sońǵy úrdisteri álemdi tań qaldyryp, keıbir elderdi «uıatqa» qaldyrýda. Iýrıı Shatýnovtyń «Sedaıa noch» ániniń Kane Ýesttiń daýysymen oryndalǵan JI-kaveri Reseı men TMD elderinde keńinen tarap, qoǵamda qyzý talqylaý týdyrdy. Bul jaǵdaı mádenıettiń shynaıylyǵy men jasandylyq arasyndaǵy shekarany bulyńǵyrlap, jańa suraqtar týyndatýda.

Bul týraly Infohub.kz aqparat agenttigi habarlaıdy.

JI-kaverdiń «jańa ómiri»

Áleýmettik jelilerde Iýrıı Shatýnovtyń 90-jyldardaǵy hıt áni «Sedaıa noch» jasandy ıntellekt arqyly Kane Ýesttiń daýysymen qaıta oryndalyp, viral boldy. Bul týyndyny jasaǵan @augustseptemberov esimdi qoldanýshy buǵan deıin de Bıllı Aılıshtiń daýysymen «Prekrasnoe daleko» ániniń JI-kaverin usynǵan bolatyn. Bul ánderdiń avtoryna tıisti ruqsat alynbaǵan, bul jaǵdaıdy jaı ǵana tehnologıalyq eksperıment emes, mádenıettegi «dıagnoz» retinde qarastyrýǵa negiz beredi.

Haıp pen shynaıylyq

Keıbir reseılik medıa men Telegram-arnalar bul feık vıdeony shynaıy jańalyq retinde taratty. Aýdıtorıanyń kóp bóligi úshin tiri ártis pen sıntezdelgen daýys arasyndaǵy aıyrmashylyq mańyzdy bolmaı shyqty. Tyńdaýshylar Kane Ýesttiń Shatýnov ánin «tamasha oryndaǵanyna» qýanyp, tipti onyń resmı akkaýntyn belgilep, ándi shynaıy relız retinde qabyldady. Bul jaǵdaı adamdardyń aqparattyq shynaıylyqqa degen talabynyń tómendegenin kórsetedi.

Jasandy juldyzdardyń kóbeıýi

Reseıde JI damyǵan saıyn, jalǵan ánshiler, modelder men blogerler kóbeıip keledi. Mysaly, «ánshi» Sıenna Roýzdyń (Sienna Rose) búkil obrazy neırojeliniń týyndysy ekeni anyqtaldy. Onyń mýzykasy da jasandy, ánderi basqa týyndylardyń elementterinen quralǵan. DW jýrnalıseriniń zertteýi boıynsha, bul jobanyń artynda Oslo turǵyndary Haffshtaın Rýnnerson jáne Maksım Mýravev tur. Mýravevtiń VK akkaýntyndaǵy «soviet_agent» degen aty onyń Reseımen baılanysyn kórsetedi.

Taǵy bir mysal – reseılik «vırtýaldy Snegýrochka» jobasy. Aleksandra Komovıchtiń jasaǵan bul keıipkeri «Rasskajı, Snegýrochka, gde byla?» ániniń remıksimen tanymal boldy. Alaıda, quqyq ıesiniń talabymen án buǵattaldy. Budan bólek, 2018 jyly jasalǵan model ári bloger Alena Pol (Aliona Pole) da JI týyndysy bolyp shyqty.

Rýhanı kedeılik pen sımýlásıa

Tehnologıa adamzattyń ıgiligine qyzmet etý ornyna, búginde joqty bardaı kórsetip, bos qýysty toltyratyn quralǵa aınalýda. Tól mádenıetti damytýdyń ornyna, bóten beınelerdi urlap, sodan lázzat alý – rýhanı kedeıliktiń belgisi. Sımýlásıaǵa sengen qoǵam erteńgi kúni shyndyqpen betpe-bet kelgende, óz beınesin de tanymaı qalýy múmkin.