InfoHub Logo

Astanada Threads áleýmettik jelisinde armıadaǵy zorlyq týraly jalǵan jazba jarıalaǵan azamat ustaldy. Bul týraly Polisia.kz saıtyna silteme jasap Tengrinews.kz habarlady.

Aqparatqa súıensek, 23 aqpanda Threads jelisinde anonımdi post jarıalanǵan. Onda avtor óziniń áskerde qyzmet etken kezinde zorlyq kórgenin aıtyp, qýdalaýdan qorqatynyn málimdegen. Ol bir jyl buryn áskerden oralǵanymen, sol oqıǵanyń saldarynan áli kúnge deıin aıyǵa almaı júrgenin aıtqan.

Jazbada komandırdiń ózine seksýaldy sıpattaǵy áreketter jasaýǵa májbúrlep, áıtpese jazalaıtynyn aıtyp qorqytqany týraly baıandalǵan. Avtor oqıǵany egjeı-tegjeıli sıpattap, kóptegen qoldanýshylardyń nazaryn aýdarǵan.

Sonymen qatar, ol elden ketýge asyǵys sebebi bar ekenin aıtyp, qarjylaı kómek suraǵan. Postqa aqsha aýdarý úshin bank rekvızıtteri qosa tirkelgen.

Aldaýdyń qalaı áshkerelengeni

Jazbanyń shynaıylyǵyna kúmán keltirgen qoldanýshylardyń biri polısıaǵa habarlasyp, kórsetilgen derekterdi tekserýdi suraǵan. Tekserý barysynda bank shotynyń ıesi 17 jastaǵy jasóspirim ekeni anyqtaldy.

Ol óz rekvızıtterin hostelde tanysqan tanysyna bergenin aıtty. Tanysy óziniń esepshottaryndaǵy problemalarǵa siltep, aýdarymdarǵa kómektesýdi suraǵan. Jasóspirim onyń qandaı da bir zańsyz áreketterge baratynyn bilmegen.

Eki kún ishinde onyń shotyna 100-den astam aýdarym túsken.

Ustaý jáne saldary

Jedel-izdestirý sharalary barysynda jazba avtory anyqtalyp, ustaldy.

«Jarıalanǵan aqparattyń shyndyqqa janaspaıtyny anyqtaldy. Onyń ústine, kontent avtorynyń áskerı qyzmetke eshqandaı qatysy joq jáne eshqashan áskerde bolmaǵan. Óz áreketimen ol áskerı qyzmetti de qorlaǵan. 23 jastaǵy qala turǵynynyń aıtýynsha, jalǵan habarlamany aqsha jınaý maqsatynda ádeıi taratqan», - dep habarlady polısıa.

Kórineý jalǵan aqparat taratqany jáne alaıaqtyq faktileri boıynsha qylmystyq ister qozǵaldy. Kúdikti sot sanksıasymen qamaýǵa alynyp, ýaqytsha ustaý ızolátoryna toǵytyldy.