InfoHub Logo

Astanada ótken Jeńistiń 80 jyldyǵyna arnalǵan áskerı parad – maıdangerlerge taǵzym etý men qazirgi Qazaqstan armıasynyń áleýetin kórsetý maqsatynda uıymdastyryldy. Shara – tarıhqa qurmet pen bolashaq qaýipsizdikke senimdiliktiń sımvolyna aınaldy.

Paradqa Qazaqstan Qarýly kúshteriniń barlyq quramynan 4 myńnan asa áskerı qyzmetker qatysty. Sherý barysynda 200-den astam áskerı tehnıka men qarý-jaraq, 66 áskerı avıasıa quraldary – ushaqtar men tikushaqtar tartyldy.

Bıylǵy paradtyń ereksheligi – alǵash ret «Býk», «Tor» syndy zenıttik-raketalyq keshenderdiń, «Barys», «Alan», «Aıbar», «Taımas», «Terreks» sıaqty zamanaýı dóńgelekti urys mashınalarynyń jáne mınalardy zalalsyzdandyratyn robottarmen jabdyqtalǵan arnaýly kólikterdiń sapqa qosylýy boldy.

Sondaı-aq, Qazaqstannyń qorǵanys ónerkásibi kesheni aldaǵy ýaqytta shyǵarýdy kózdep otyrǵan urys tehnıkasy – robottandyrylǵan qaıyq, ushqyshsyz basqarylatyn ushý qondyrǵylary jurt nazaryna usynyldy.

Parad barysynda áýe keńistiginde de áserli kórinis ornady. A-400 áskerı-kólik ushaǵy, L-410 jolaýshylar ushaǵy men Bı-300 patrúl ushaǵy aspandy jaryp ótti.

Bul áskerı sherý – ata-babalardyń erligine degen taǵzym men egemen eldiń qorǵanys qýatynyń úılesimdi kórinisi retinde tarıhta qalmaq.