InfoHub Logo

Nazarlaryńyzǵa jumysqa turý barysynda jiberiletin qatelerdiń tizimin usynamyz. Eger osy qatelerge jol bermeseńizder, jumysqa turyp ketý múmkindigi arta túsetinin de eskere keteıik.

1. Tym uzyn qosymsha hat jazý nemese múldem qosymsha hat jazbaý

Jumys berýshi mekemeniń HR qyzmetindegi mamandar elektrondy poshtalaryna kelgen árbir túıindemege qosymsha berilgen hattardy oqı otyryp, olardan sizdiń balalyq shaǵyńyzǵa saıahat jasaý, ne bolmasa sizdiń januıańyz ben jaqyndaryńyzǵa ǵana qyzyqty bolyp kórinýi múmkin ómirlik hıkaıalaryńyzben tanyssa, qate jiberdińiz deýge bolady. Sebebi naqty jumysqa qatysty derekterdi ǵana berý arqyly siz ózińizdiń kásibı deńgeıińizdi kórsete alasyz.

Taǵy bir qatelik – túıindememen birge eshbir qosymsha hat jibermeý nemese bir-eki aýyz sózben ǵana tym qysqa qaıyryp, «Meniń kandıdatýramdy qarastyrýlaryńyzdy suraımyn. Kompanıalaryńyz úshin qajet maman bolyp tabylamyn!» dep jazý da ádepsizdikke jatady. Budan da asqan dórekilik – túıindemeni ǵana jiberip, oǵan eshbir qosymsha hat jazbaý. Eń durysy, hattyń basynda amandasyp, qysqa da nusqa túrde ózińizdiń osy kompanıaǵa nemen paıdaly bola alatynyńyzdy jazýǵa bolady. Bul jerde kandıdatqa qoıylatyn talaptardyń tizimi kómekke kelýi múmkin.

2. Jeke qabiletterińizdiń tizimin joldaý

Jumysqa turýshy adam óziniń jumys tájirıbesiniń jetkiliksiz ekenin bilgen kezde, ony óziniń jeke basyna qatysty qabiletterimen tolyqtyrýǵa tyrysyp baǵady. Osy sebepti túıindemesiniń bir bóligin shablonmen jazylǵan qabilettermen toltyrýdy jón kóredi. Olardyń ishinde stress jaǵdaıyna tótep berý, kreatıvtilik, ár nárseni úırenýge degen ynta men ózgeleri de kezdesip jatady. Alaıda munyń báriniń tek shablondy nárseler ekenin jáne sizdiń jeke basyńyzǵa qatysty qabiletterińizdi tolyqqandy ashpaıtynyn umytpaý qajet.

Eń durysy naqty sizge tán 2-3 erekshe qabiletińizdi kórsetý arqyly ózińizdiń ereksheligińizdi basyp kórsetý bolyp tabylady. Jáne de osy qabiletterińizge dálel bolatyn sertıfıkattaryńyz ben dıplomdaryńyzdy qosa berý de mańyzdy.

3. Jibermeı turyp, túıindemeńizdi jaqsylap oqyp shyqpaý

Negizi, túıindemeńiz ben oǵan qosymsha retinde joldanatyn hatty aldyn ala durystap oqyp shyǵý qajettiligi aıtpasa da túsinikti bolyp eseptelgenimen, adamdardyń kóp bóligi olarda birshama qate jiberip jatady. Mysaly, redaktor nemese korektor laýazymyna túıindeme joldaı otyryp, keleńsiz bir qatelerge jol berseńiz, jumysqa turý múmkindigińizdiń birshama tómendeı túsetini belgili. Alaıda tehnıkalyq mamandyqtar boıynsha ashylǵan vakansıalarǵa da túıindeme tapsyrý barysynda muqıat bolǵan abzal, sebebi gramatıkalyq qatelerge jol bermeý de jumys berýshi úshin mańyzdy bolýy múmkin.

4. Jumys berýshi sizdiń áleýmettik jelilerińizge kirýi múmkin ekenin umytý

HR-mamanǵa unaıtyndaı bir túıindeme joldaýmen is bitpeıtinin umytpaý qajet. Túıindeme qosa áleýmettik jelilerdegi ózińizdiń akkaýnttaryńyzdy da berý qajet ekenin esten shyǵarmaǵanyńyz abzal. Sebebi shyǵarmashylyqpen baılanysty jumysqa ornalasý barysynda jumys berýshi áleýmettik jelilerge kirip, sizdiń shyǵarmashylyǵyńyzǵa qatysty post jasaǵan-jasamaǵanyńyzdy tekserip shyǵýy múmkin. Al, memlekettik mekemelerge jumysqa turǵyńyz kelse, akkaýnttaryńyzdy keleńsiz fotolardan tazartýyńyz qajet bolar. Sondaı-aq, bolashaq event-menedjerdiń Feısbýk paraqshasynda 20-aq dosynyń bolýy da kúdik týdyrary anyq.

5. Túıindemeńizdiń jetip-jetpegenin bilý maqsatynda habarlasý

Rekrýterdiń aldynda jańa ashylǵan vakansıaǵa durys mamandy tańdap alý maqsaty turǵandyqtan, onyń jumys poshtasyna júzdegen hat kelýi múmkin. Sondyqtan túıindemeńizdi jibere sala telefon shalyp habarlasý qajet emes. Jáne sizge birden habar bermeı jatsa, bul oń nátıje bolmaıdy degenmen para-par emes. Sebebi ondaǵan, al keı jaǵdaılarda júzdegen adamnyń túıindemesin qarap shyǵý jáne olardyń ishinen bir kandıdatty tańdap alý biraz ýaqytty qajet etetini belgili.

6. Suhbattasýdy jalaqy týraly suraqtan bastaý

Kez kelgen jumys berýshi jumysqa ornalasýǵa kelgen kandıdattan birinshi kezekte aqshaǵa emes, iske berilýdi talap etedi. Sondyqtan jumys berýshi bolashaq jumysyńyzǵa qatysty suraqtar qoıa alasyz degende, birden jalaqy máselesine emes, jumys barysynda ózińizge júkteletin mindetter tizimine, jalpy ujymnyń uıymshyldyǵyna jáne osy jumys ornyna qandaı jańalyq engize alatynyńyzǵa toqtalǵan abzal. Al aqsha máselesin suhbattasýdyń sońyna qaldyrsańyz da bolady.

7. Osyǵan deıingi jumys ornyn synaý

Kandıdat tarapynan burynǵy bastyqtary men jumys ornyna qatysty synı sóz aıtylsa, jumys berýshi ózin yńǵaısyz sezinýi múmkin. Sebebi biraz ýaqyttan keıin kandıdat osy jerden de ketken jaǵdaıda, ózine qatysty osy tektes pikir aıtylmasyna kim kepil bola alady.

Sondyqtan burynǵy jumys ornyńyzdan shyǵýyńyzdyń sebebi týraly sóz qozǵalǵanda, máseleniń negizgi sebepshisi retin burynǵy basshylyǵyńyzdy aıyptaý qate bolady. Jańa bir iske kirisip, ne bolmasa osy tektes mekemedegi belgili bir salany damytý maqsatynda burynǵy jumysymnan shyqtym deseńiz, ózińizdiń jumysqa ornalasý múmkindigińizdi birshama arttyrasyz. Al burynǵy jumysyńyzda oryn alǵan keleńsiz jaǵdaılar keride qalsyn, olarǵa kóńil bólýdiń keregi joq.

8. Osy jerde naqty jumys isteıtinińizge senimsizdik bildirý

Birden birneshe mekemege túıindeme joldaý cizdiń jumysqa ornalasyp ketý múmkindigińizdi arttyrary sózsiz. Alaıda suhbattasý barysynda «basqa jerden» jaýap kútýdemin deseńiz, jumys berýshi óz mekemesiniń ciz úshin ekinshi orynda ekenin sezinýi múmkin. Sol sebepti sizdiń bul jerge taǵy bir márte oralýyńyz ekitalaı.

Bolashaǵyńyzǵa qatysty josparlaryńyz týraly suraqtarǵa da durys jaýap bere alý óte mańyzdy bolyp tabylady. Sebebi «Ózińizdi 2 jyldan keıin qaı jerde kóresiz?» degen suraqqa «Álemdi sharlap júrmin» dep jaýap berý qate bolar edi. Sondyqtan jumys berýshi óz bolashaǵyńyzdy osy mekememen etene tyǵyz baılanysta bolmasa da, óz biliktiligińizdi arttyra túsý maqsatynda jumys isteý úshin qolyńyzdan kelgenniń bárin jasaýǵa daıyn ekenińizdi kórse jetkilikti.

---