InfoHub Logo

Saıasatker Altynbek Sársenbaevtiń, onyń kúzetshisi men júrgizýshisiniń qaza bolǵanyna 20 jyl toldy. Bul kún saıasatkerdiń jaqyndarynyń jańa málimdeme jasaýyna sebep boldy. Olar isti «jańadan ashylǵan mán-jaılar boıynsha» qaıta qaraýdy talap etip, Bas prokýratýraǵa ótinish joldady.

Bul týraly Infohub.kz aqparat agenttigi habarlaıdy.

İs boıynsha zańbuzýshylyqtar men kúdikter

Sársenbaevtyń týystary tergeý men sot prosesi kezinde eleýli zańbuzýshylyqtar bolǵanyn, keıbir mańyzdy jaıttarǵa tıisti baǵa berilmegenin aıtady. Ótinishte sotqa berilgen is boıynsha aýdıojazbaǵa silteme jasalyp, onda Nursultan Nazarbaevqa tıesili delinetin sózder keltirilgen. Jazbada «is boıynsha bári dáleldengen, aıqaılaýdyń qajeti joq, bir aıdan keıin is sotqa beriledi, halyq búgin sóılesedi de, erteń umytady» degen mazmundaǵy pikir aıtylǵan.

Ótinish ıeleri bul derektiń sot úkiminiń aldyn ala sheshilgenin meńzeıtinin, ıaǵnı sot bastalmaı turyp, bir aı buryn Prezıdenttiń isti sheship qoıǵanyn, al sot prosesi tek qoǵam úshin qoıylǵan kórinis bolǵanyn alǵa tartady.

Nazarbaevty jaýapqa tartý talaby

Sársenbaevtyń týystary Qazaqstannyń Tuńǵysh Prezıdentinen jaýap alý qajettigin alǵa tartady. Olardyń pikirinshe, atalǵan aýdıojazbanyń ózi sot úkimin joıýǵa negiz bolýy tıis, al Nursultan Nazarbaev osy másele boıynsha jaýapqa tartylýy kerek.

Týystar bul oqıǵany «saıası terror aktisi» dep atap, Nursultan Nazarbaevtyń otbasy múshelerin qylmystyq jaýapkershilikke tartý máselesin kóterdi.