InfoHub Logo

Qazaqstannyń halyq ártisi Maqpal Júnisova óziniń Instagram paraqshasynda arhıvtik vıdeo jarıalap, óner jolyndaǵy bastan keshken qıyndyqtary týraly aıtyp berdi. Ánshiniń aıtýynsha, bir kezderi iri baıqaýda jeńiske jetkenimen, fınalǵa qatysa almaǵan.

Bul týraly Infohub.kz aqparat agenttigi habarlaıdy.

«Almatyda ótken osy konkýrsta 3000 adamnan birden kózbe-kóz daýys jınap, men jeńip shyqqan edim. Fınalǵa Máskeýge daıyndyq eki aı júrdi, biraq eki apta qalǵanda, osy irikteýde múldem qatyspaǵan Baqtıar Taılaqbaev barady dep Mádenıet mınıstrliginen habar keldi. Men jylap, jaman bolǵan kez eske tústi», – dep jazdy Maqpal Júnisova.

Ánshiniń óner jolyndaǵy qıyndyqtary

Ánshi bul jaǵdaıdy ádiletsizdik retinde baǵalap, sol sáttiń áli kúnge deıin júreginde qalǵanyn jetkizdi. Maqpal Júnisova – qazaq estradasynda ózindik qoltańbasyn qalyptastyrǵan, halyqtyń erekshe yqylasyna bólengen óner ıesi. Ol 1963 jyly Qaraǵandy oblysy, Qarqaraly aýdanyndaǵy Terekti aýylynda dúnıege kelgen.

Ónerge erte aralasqan ánshi 1981 jyldan bastap «Qazaqkonsert» birlestiginiń solısi retinde úzdiksiz shyǵarmashylyqpen aınalysyp keledi. Tabıǵı darynymen kózge túsken ol halyqaralyq baıqaýlarda top jaryp, kásibı deńgeıin dáleldedi. Nebári 22 jasynda «Qazaqstannyń eńbek sińirgen ártisi» atansa, 31 jasynda «Halyq ártisi» ataǵyna ıe bolýy – onyń ónerdegi bıik jetistikteriniń aıqyn kórinisi.

Ánshi bilimge de erekshe mán bergen. Ol Ál-Farabı atyndaǵy Qazaq ulttyq ýnıversıtetin támamdap, keıin ǵylym men bilim salasynda da belsendi eńbek etip, profesor dárejesine deıin kóterildi. Maqpal Júnisovanyń basty ereksheligi – lırıkalyq soprano daýysy. Onyń repertýary halyq ánderimen qatar romans pen jaz janryndaǵy týyndylardy qamtıdy. Bul onyń shyǵarmashylyǵyn baıytyp, tyńdarman aýdıtorıasyn keńeıte tústi.

Búginde ol qazaq estradasynyń «prımadonnasy», «Orta Azıanyń bulbuly» retinde keńinen tanylǵan. Ánshiniń konsertteri áli de anshlagpen ótip, kórermen tarapynan joǵary suranysqa ıe.