InfoHub Logo

Jırensheniń balasy óte jýas eken. Áz Jánibek han Jırenshe sheshennen:

— Jaqsydan jaman týar ma? — dep surapty. Sonda Jırenshe:

— Jaqsydan jaman týmaıdy, — dep jaýap beripti.

Jánibek han: «munysy qalaı?» dep oıyna alyp júr edi, Jırenshe sheshen ólgennen keıin neshe jyldardan soń áz Jánibek han qalmaqtarǵa qarsy jurtqa attanatyn bolyp, sheshenniń balasyna «júrsin» dep habar aıtyp, júrmek bolypty. Sheshenniń balasynyń syr minez aty joq eken dep, ákem: «syr minez atyń bolmasa, syry ashylmaǵan besti at min deýshi edi» dep hannan surap jıren besti at minip, joryqqa birge barady. Soǵysta qalmaq jaǵy basym bolyp, áz Jánibektiń áskeri tym-tyraqaı bolyp qashyp, elge qaraı jónelip, Jırensheniń balasy hannan ozbaı, qatar qashyp kele jatqanda hannyń aty boldyryp, qolǵa túsetin kúıge ushyraıdy. Sonda Jırensheniń balasy:

— Taqsyr, astyńyzdaǵy boldyrǵan atty maǵan berińiz, men atymnyń basyn tartyp kelemin, — deıdi. Sonda áz Jánibek:

— Árkimniń óz jany tátti degen emes pe? Maǵan atyńdy bergenshe, óziń qashyp qutylsań bolmaı ma? — depti. Sonda Jırensheniń balasy:

— Men qolǵa tússem de esh nárse emes, siz qolǵa tússeńiz, «qazaqtyń hany qalmaqty shabam dep barǵanda halqy qashyp ketip, hany qolda qalypty» degen sóz qazaq atyna óshpeıtin tańba bolar edi, — depti. Áz Jánibek Jırensheniń balasynyń atyna minip, jaýdan aman-esen qutylady. Bir-eki kún ótken soń boldyrǵan atpen Jırensheniń balasy da aman barypty. Barǵannan keıin han Jırensheniń: «jaqsydan jaman týmaıdy» degen sóziniń shyndyǵyna nandy. «Jırensheniń balasyn jýas kórip júrýshi edim, Jırensheniń aıtqany durys bolyp shyqty», — dep Jırensheniń balasyn ózine bas ýázir qylyp saılapty.

Taýdan aqqan tas bulaq
Quımaı qoımas teńizge.
Jaqsy ákeden týǵan ul
Qansha jaman deseń de,
Tartpaı qoımas negizge, — degen sol.

---