InfoHub Logo

Áz Jánibek han bir kúni Jırenshege qarap:

— Osy seniń balań qalaı jaman týdy eken. Sheshesi Qarashash, ákesi, Jırenshe, sensiń. Osyndaı eki suńqardan eń beri bolǵanda turymtaı týmaı, áljýaz jaǵaltaı bolyp týǵanyna tańym bar. Ózi bir qoı aýzynan shóp almaıtyn momyn sorly ǵoı, — dep kekete sóılegende Jırenshe turyp:

— Han ıem, durys aıtasyz, keıbir balanyń týǵanda syrty qola, ishi altyn bolady. Beri kele jıyrmaǵa jetkenshe onyń syrtqy qolasy tozyp túlep túsedi de, ishindegi altyny jarqyrap syrtyna shyǵady. Sol kezde osy balamdy kórińiz, kózińiz qoryqpasa, menen týmaǵan bolsyn, —
depti.

Kúndi kún qýyp, jyldy qýyp jyl óte beripti. Jırenshe de, Qarashash ta ana dúnıege attanyp ketipti. Bir kúni ymyrt jabyla quba qalmaqpen soǵysyp júrip áz Jánibek antalaǵan jaýdyń ortasynda jaıaý qalypty. Sol mezette kók qasqa dónen mingen bir bala shaýyp kelip, qarǵyp túsip, áz Jánibektiń aldyna atyn tartyp turyp:

— Minińiz myna kók dónenge, qashyp qutylyńyz! Qazaq eliniń bir áıeli búgin býaz bolsa, mendeı bir balany taba jatar, al siz — jalqy týǵan Jánibeksiz, kúnde týa bere almassyz, — depti.

Budan jıyrma jyl buryn «shobyr, momyn» atanǵan bala osy eken. Aty Qasym desedi muny bilgender. Áz Jánibek qateleskenine, Jırenshe men Qarashashtyń júregine qaıaý salǵanyna ókinip, opyq jese kerek.

---