InfoHub Logo

Belgili kásipker Arsen Tomskıı Olımpıada chempıony Mıhaıl Shaıdorovtyń ákesi ári alǵashqy bapkeri Stanıslav Shaıdorovqa qurmet kórsetip, Audi Q8 avtokóligin syılady. Bul syılyq ulynyń jeńisine úles qosqan ákeniń eńbegin baǵalaý retinde berildi. Kásipker bul qýanyshty sátti áleýmettik jelidegi paraqshasynda bólisti.

Bul týraly Infohub.kz aqparat agenttigi habarlaıdy.

Arsen Tomskııdiń aıtýynsha, Stanıslav Shaıdorov – ulynyń jeńisiniń artynda turǵan, eńbegi sińgen, qajyrly jan. Ol ulynyń alǵashqy bapkeri ári osy tarıhı jeńistiń bastaýynda turǵan adam.

Ulynyń jeńisi jolyndaǵy ákeniń eńbegi

«Mıhaıl álemge óziniń ónerin kórsetip, Qazaqstan men shetelde mıllıondaǵan adamdarǵa shabyt syılady. Biraq bul altyn medaldiń artynda kúndelikti eńbek, temirdeı tártip pen ózin-ózi qurban etýge toly uzaq jyldar jatqanyn bilý qajet», – dedi kásipker.

Tomskıı burynǵy jyldary Stanıslav Shaıdorovtyń ulynyń sporttaǵy jolyn qoldaý úshin óz kóligin satqanyn da atap ótti. «Bir kezderi ol ulynyń shyńǵa jetý jolyn qoldaý úshin óz kóligin satýǵa májbúr bolǵan. Men de eki ret óz kóligimdi osyndaı senimdi is úshin sattym: birde komandanyń jalaqysyn tóleý úshin, endi birde qarjy jetispegen kezde Iakýtıa quramasyn kıbersport chempıonatyna jiberý úshin», – dep bólisti Tomskıı.

Emosıaǵa toly sát

Kólikti tabystaý sátinde Mıhaıldyń ákesi Stanıslav Aleksandrovıch emosıasyn jasyra almady. Ol kóz jasyna erik berip, ulymen birge ótken uzaq joldyń, seniminiń Olımpıada altynyna aınalǵanyn kórgen adamnyń tolqynysyn bildirdi.

Jazbanyń sońynda kásipker úlken jeńisterdiń artynda árdaıym senim turatynyn atap ótti. «Árbir chempıonnyń artynda bir kúni: “Men saǵan senemin” degen adam turady. Uly jeńister árqashan senimnen bastalady. Shaıdorovtar otbasyna jáne búkil Qazaqstanǵa jańa jeńister, qýanysh pen maqtanyshqa toly sátter tileımin!» – dep qorytyndylady Arsen Tomskıı.