InfoHub Logo

Kúıeýiniń qoly tıip ketken edi. Burynǵy sezimmen qosylyp turmysqa shyqqan kóńilinde sodan keıin oǵan degen paıda bolǵan ókpe me, renish pe, áıteýir, birdeńe burynǵy oǵan arnalǵan júregindegi súıispenshilik sezimimen birge ishki saraıynda birin-biri jeńe almaı, ıtjyǵys túsip, almasyp keldi de otyrdy.

- Aıdyn, áý, Aıdyn! Myna kóılekti kıip kórshi! Saǵan alyp edim! Qane! Durys alǵan ekem ǵoı! Má, keremet jarasyp tur eken! Týra bir kóılektiń jarnamasyndaǵy jigitterdeı boldyń da qaldyń! (Osy kezde urǵany esine túsip ketip, ishinen). Qolyń synǵyr, qolyń synǵyr. Meni urǵan qolyń synyp qalmaıdy-aý seniń. Qolyń synyp, kóılektiń jeńi salbyrap tursa, jaqsy bolar edi.

- Aıdyn, áý, Aıdyn! Erteń Jumabekter qaryndasyn uzatqaly jatqan joq pa? Osy kóılekti sol kezde kıip barasyń ǵoı! Jarasymdy bolyp barǵanyń ózińe jaqsy ǵoı! (Urǵany esine túsip ketip). Seni kim shaqyrǵaly jatyr soǵan?! Tek men júrgesin shyǵar qasyńda.

- Aıdyn, áý, Aıdyn! Erteń Jumabektiń úıine barǵanda, oı, inishekter shyǵady ǵoı aldyńnan. "Aıeke, assalaýmalıkým! Aıeke, assalaýmalıkým!" - dep. Syılaǵany ǵoı endi. İnishekter, qaıtsin, aǵa dep syılap turady ǵoı. (Urǵany esine túsip ketip). Seni qaıbir syılaıyn dep, syılap jatyr deısiń solar? Elý gram ishkennen keıin: "İnishek, ne, áldeqandaı bolyp qaldyń ba?! Baǵana nege amandaspaısyń aǵańa?!" - dep otyrǵyzbaısyń ǵoı sen.

- Aıdyn, áý, Aıdyn! Erteń týǵan kúniń ekenin óziń umytyp qalǵan joqsyń ba?! Men kishkene daıyndyq jasap alaıynshy. Áýeli, myna jerdi jınap alaıyn. Saıdyn, papaǵa barshy! Júgirip papaǵa bar! Aıdyn, ózińe shaqyrshy Saıdyndy. (Urǵany esine túsip ketip). Topas sol! Saıdyn degen attyń bizdiń tilimizde ne mán-maǵynasy bar dese, túsinetin be edi bul? Buǵan tek óziniń atyna uıqasyp tursa, boldy, áıteýir!

- Aıdyn, áý, Aıdyn! Osy Saıdyndy qyzdar aıtady ǵoı:  "Má, papasynan aýmaı qalǵan-aý! Qalaı uqsap qalǵan, ıá!" - dep. (Urǵany esine túsip ketip). Saǵan ıt uqsasyn. Saǵan kóshedegi ıttiń uqsap turǵany jaqsy edi!

- Aıdyn, áý, Aıdyn! Erteń aldymen Qaıdyn men Paıdyn kelip quttyqtaıtyn shyǵar? Sol eki qaınym baýyrmal osy! Jyldaǵy ádetteri ǵoı, qulqyn sáriden kelip: "Assalaýmaǵaleıkým, Aıdyn aǵa! Assalaýmaǵaleıkým, Aıdyn aǵa!", "Týǵan kúnińiz qutty bolsyn, Aıdyn aǵa!" - dep ózderi kirip quttyqtap ketetinderi. (Urǵany esine túsip ketip). Qudaı saqtasyn, qalaı qoıǵan attar deseıshi? Aıdynyn Aıdyn deıik, al! Qaıdyn, Paıdyn degen sózderdiń bizshe ne maǵynasy bar? Bularǵa, áıteýir, uıqasy kele berse, boldy eken ǵoı.

- Aıdyn, áý, Aıdyn! Osy Qaıdyn úılengisi kelip júr-aý deımin? Negizi, úılengisi keledi. Ashyp aıtpaıdy sózin. Sonda da sezemin ǵoı. Jeńge emespin be endi. Biraq bizdiń Qaıdyn qyzǵa óte qatty qaraıdy ǵoı, qatty synaıdy qyzdardy. (Urǵany esine túsip ketip). Soǵan kim tıgeli jatyr osy? Ózine qarap alsynshy, áýeli. Men sıaqty sory qaınaǵan bireý tıeıin dep turǵan shyǵar?

- Aıdyn, áý, Aıdyn! Biraq men de Qaıdynǵa aıtamyn ǵoı: "Durystap qarap al, janym. Ómirde bir-aq ret úılenesiń. Qazir neshe túrli qyzdar bar. Kúıesin jaǵa almaı turǵan qyzdar da bar", - dep aıtyp otyramyn. Jeńge bolǵasyn, janym ashıdy ǵoı endi. (Urǵany esine túsip ketip). Qaıdynnyń ózi kúıesin jaǵyp jibermese deseıshi, áýeli. Qaıdyndy kórse, qyzdar qyryq shaqyrymnan aınalyp qashyp júretin shyǵar?

- Aıdyn, áý, Aıdyn! Osy sen Paıdynnyń án aıtatynyna nazar aýdarasyń ba? Bizdiń Paıdyn ándi keremet aıtady ǵoı! Daýsy keremet biraq! Qyzdarǵa da aıtyp otyramyn ǵoı, meniń Paıdyn degen ánshi qaınym bar dep. Qyzdar da aıtady, ózin bir tyńdap kóretin eken, ár nárseniń de bir sáti bolady ǵoı dep. (Urǵany esine túsip ketip). Osylarǵa óner qaıdan qonyp júr deseıshi? Óner degen de qonbaıtyn jerge kelip qona beredi eken ǵoı ózi. Mynaýsynyń túri bolsa, mynaý.

- Saıdyn! Papańnyń moınyna minip alshy! Papanyń moınyna minip al! Tep sosyn óksheńmen. Ókpesiniń tusynan tepshi. (İshinen). Má, ózim tepkendeı raqattanyp qaldym ǵoı. Myna baıǵus máz soǵan, balasynyń tepkenine. Meniń ne oılap otyrǵanymdy bilmeıdi.

(Ózine-ózi). Qoı! Maǵan ne bolǵan osy?! Bir ret qoly tıip ketti eken dep, sonsha ókpelegenim nesi? Myna baıǵustyń oıynda eshteńe joq. Máz bolyp otyr. Qoı, odan da keshirimshil bolaıyn.

(Kúıeýine jaıdary qalypta qarap). Aıdyn, áý, Aıdyn! Aldymen jurttyń bárinen buryn týǵan kúnińmen ózim quttyqtap qoıaıynshy! Týǵan kúnińmen, janym! (Súıedi).

---