InfoHub Logo

Qazaqstandyq shahmatshy, álem chempıony Bıbısara Asaýbaeva óziniń Telegram arnasyndaǵy jazbalaryna qatysty pikir bildirip, jankúıerlerine úndeý jasady. Bul týraly Infohub.kz aqparat agenttigi habarlaıdy.

22 jastaǵy sportshynyń aıtýynsha, jarystardan keıin aýdıtorıasy kóbeıip, arnasyn júrgizý qıyndap ketken. Ol buǵan deıin arnasyn óziniń jeke kúndeligi retinde paıdalanǵanyn aıtty.

«Negatıvti bloktaımyn»

«Úlken aýdıtorıamen birge árdaıym negatıv pen syn keledi. Karera boıy men mundaıǵa úırengenmin, biraq arnada jaıly atmosferany saqtaǵym keledi. Sondyqtan maǵan baǵyttalǵan kez kelgen negatıvti men bloktaımyn», - dedi Asaýbaeva.

Ol sondaı-aq, óziniń ómirine qatysty keńester bermeýdi ótindi. «Qalaı ómir súrý kerektigi, kimmen kezdesý, kimmen dos bolý kerektigi týraly maǵan keńes bermeýlerińizdi suraımyn. Meni jaqsy kórýlerińizdi talap etpeımin, sizderge unaý mindetti emespin. Eger sizderge birdeńe unamasa, jaı ǵana jazylyńyz», - dep qosty shahmatshy.

Aıta keteıik, Bıbısara Asaýbaevanyń Telegram arnasynda shamamen 20 myńdaı oqyrmany bar.

Sporttyq jetistikteri

Bıbısara Asaýbaeva – blıs boıynsha úsh dúrkin álem chempıony. Ol sońǵy ret 2025 jyldyń sońynda ótken týrnırde jeńiske jetken bolatyn. Osy jeńisiniń arqasynda 2026 jylǵy pretendentter týrnırine qatysý quqyǵyn ıelendi.

Buǵan deıin shahmatshy Tengri Sport-qa bergen suhbatynda týrnırlerge daıyndyqqa ketetin shyǵyndary týraly aıtqan edi.

Bıyl sáýirde Bıbısara Asaýbaeva Kıprde ótken 2026 jylǵy pretendentter týrnırinde ekinshi oryndy ıelendi. Bul jetistik onyń Halyqaralyq shahmat federasıasy (FIDE) áıelder arasyndaǵy reıtıńisinde 7-orynǵa kóterilýine múmkindik berdi.