InfoHub Logo

«Kókil» kúıine qatysty el ishinde ańyz-áńgime kóp. Sonyń biri Qazanǵap pen Úsen tóreniń alǵash kezdesýine baılanysty aıtylady. Birde Qazanǵap el aralap júrip Qaraqamysta otyrǵan Úsen tóreniń úıine túsedi. Úsen tóre úıinde joq eken. Qazanǵap sýsyn iship, shólin basqan soń, tórde súıeýli turǵan tóreniń dombyrasyna qol sozady. Úsen tóreniń dáýlesker dombyrashylyǵyn syrttaı estıtin. Tóreniń dańqyna dombyrasy saı eken, Qazanǵap qyzyǵyp ketip birer kúı tartady.

Osy kezde úıine Úsen tóreniń ózi de kelip qalady. Tórinde dombyrasyn tartyp otyrǵan beıtanys bireý. Tóre bel sheship jaıǵasqan soń, jaqtyrmaǵan shyraı tanytady.

— Qudaıy qonaq ekenińe sóz joq, bólinbegen enshiń ázir. Biraq qudaıy qonaqtyń enshisine úı ıesiniń dombyrasy da buıyrady degendi estimep edim. Dombyrama ulyqsatsyz qol tıgizgen endigi aıyp ózińnen. Tóreligin tartqan kúıiń tanytar, kórset ónerińdi, — deıdi Úsen tóre.

Qolyna dombyra jaǵyp otyrǵan Qazanǵap «Kókil» kúıin suńqyldatyp qoıa beredi. Kúı biter-bitpesten Úsen tóre eńsesin tiktep, osharyla burylyp:

— Apyraı, bul tóńirekte dombyrany bulaı sóıletetin eshkim joq sıaqty edi. Kúıiń jan-júregimdi baýrap, býynyma túsip ketti ǵoı. Osy Ulyqumda jalǵyz atty Qazanǵap degen kúıshi bar deýshi edi, jarqynym, sol sen emessiń be?! — deıdi.

Sonda Qazanǵap:

— Bolsaq, bolarmyz! — dep jymıǵan eken.

Alǵash osylaı tanysqan Qazanǵap pen Úsen tóreniń arasynda úlken kisilikti qarym-qatynas ornaǵan. Qazanǵap Úsen tóreden dombyra tartýdyń nebir sheberlik shalymdaryn úırengen. Keıin ekeýi dodaly kúı saıysyna túsken soń da bir-birine degen syı-qurmetinen aınymaǵan.

Mine, «Kókil» kúıiniń adam tanytar qudireti osyndaı.

---