InfoHub Logo

Birde Qazanǵap ońtústik óńirinen astyq alyp qaıtpaqshy bolyp, saýda kerýenine ilesip jolǵa shyǵady. Qaraqamys aýlynyń tusynan ótip bara jatyp, belgili kúıshi Úsen tóremen tanysyp, sálem bere ketpek oımen at basyn burady.

Úsen tóre jol júrip ketken eken. Qazanǵap sýsyn iship tynyqqan soń, Úsen tóreniń dombyrasyn kelininen aldyryp, tarta bastaıdy. Álden ýaqytta syrttan úıge kirgen Úsen tóre dombyrasyn tartyp otyrǵan beıtanys adamdy kórip:

— Dombyramdy meniń ruqsatymsyz alyp tartýǵa batyly jetken netken jansyń? Al endi kórset ónerińdi, eger durys tarta almasań, osy jerde aıybyńdy tóleısiń? — deıdi.

Qazanǵap ózin tanystyrý úshin «Kókeıge túsken Kókiljan» atty jańa bir kúıin shertedi. Kúıshi dombyrasy basynan ýaıym-qaıǵy arylmaǵan kedeı qaýymnyń aýyr ómiri, janyna batqan muqtajdyǵy jaıynda kúńirene jóneledi. Saı-súıekti syrqyratqan kúı sazy Úsen tóreni qatty tolqytady. Qazanǵaptyń dombyrashylyq sheberligine tań-tamasha qalǵan ol ornynan eriksiz ushyp túregelip:

— Iapyrym-aı, túr-tulǵańa qarasam, alystan kele jatqan adam tárizdisiń, shyraǵym. Bul óńirde men kórmegen, dombyrasynyń únin estimegen kúıshi joq edi. Seniń dombyrańnan tógilgen myna kúı jan-júıemdi bosatty ǵoı. Ómirdiń talaı qıyndyǵyn basyńnan ótkerip, muqtajdyqty kóp kórgen jan ekensiń. Ulyqumnyń boıynda Qazanǵap degen kedeı, jalǵyz atty tamasha dombyrashy bar dep estýshi edim, sol sen bolarsyń. Qazanǵap bolsań, joǵary shyq, tórge oz, — deıdi.

— Bolsaq, bolarmyz, — dep Qazanǵap tórge shyǵa bergen eken.

Belgili kúıshi Úsen tóre men Qazanǵap osylaısha tanysady.

---