InfoHub Logo

Árbir pende dúnıe esigin shyr etip attaǵannan bastap kórer kúni men atar tańyna úkili úmit artyp, shyńǵa shyǵý jolynda aıanbaı ter tógedi. Al osy bir sara jolǵa tastaı berik qamaldyń irgetasyn salyp, oń men solyńdy tanytyp, bilim kókjıegińidi keńeıtip, kókirek kózińdi ashatyn-aıaýly ustazyń! Shákirtiniń boıyna asyl qasıetterdi quıyp, ıgiliktiń qaınar bulaǵymen sýsyndatyp, jaqsy men jamannyń parqyn ajyratýǵa úıretip qana qoımaı, bıik bastamalaryńa sebepshi bolar jandardyń qamshynyń sabyndaı qysqa ǵumyrymyzdan alar orny bir tóbe. Ózgelerden tuńǵıyq oılarymen qatar, asqan meıirimdiligimen erekshelenetin ustazdarymyz-bizder ańsaǵan armanymyzǵa jetsek, jyly júregimen barynsha qýanyp, ystyq lebizin bildiredi. Kúndeı kúlimdegen janarlarynan maqtanysh sezimi jarq etip, shákirtterin sıqyrly nurǵa bóleıdi. Mektep tabaldyryǵyn attaǵan sátten bastap erkeligimizdi kóterip, bilim alýǵa degen qulshynysymyzdy qolpashtap, qulaǵan sátterimizde qoldap, synaqtarǵa qarsy turýdy kórsete bildi. Egemen elimizdiń tuńǵysh Prezıdenti:"Erkin elde ósken urpaqtyń rýhy árdaıym bıik bolýy tıis. Jastary jalyn júrekti, órshil namysty, bıik rýhty bolsa-ol eldiń eńsesi de bıik bolady",- dep ózge memleketterden oq boıy ozyq bolý úshin sanaly urpaqty jaqsylyqqa keneltip, adamgershilik pen adaldyqty astastyratyn oı-órisi keń tálimgerlerimizdi elimizdiń erteńi úshin eńbek etýge shaqyrdy. Osydan bolar, halqymyzda:"Adamnyń jaqsy bolmaǵy-jaqsy ustazdan" degen asyl sózdiń beleń alýy. Shákirtterin bilim kógine jetektegen keń peıildi, aq júrekti, tereń aqyl ıeleri bizge sandaǵan jyldar boıy senim artyp, jyǵylsaq-tireý, qulasaq-súıeý bola bilgen, qanatymyzdy qataıtyp, zeńgir kókte samǵaýǵa tárbıelep jatqan jarqyn júzdi ustazdar Báıdibek aýdany, Orynbaı Taımanov atyndaǵy mektep mekemesinde jemisti qyzmet atqarýda. "Shákirtine qarap, ustazyn tany", "Ustazy jaqsynyń-ustamy jaqsy" syndy astarly sózderdiń aqıqattylyǵyna barshamyzdyń kózimiz jetti. Iá, kemeńgerliktiń kemeline, mádenı qundylyqtardyń shyńyna tek talmaı eńbek etken jandar ǵana shyǵa alady. Meniń oıymsha, altyn uıamdaǵy árbir ustaz-erte kezde qolyna naıza ustap, qasyq qany qalǵansha berispegen rýhy bıik batyrlarmen ispettes. Sebebi, kemel keleshekke aıqyn baǵdardy kórsetip, sara joldy salyp berý de ekiniń-biriniń qolynan kele bermeıtin uly is. Ustazdarymnyń aıtqan mánge toly ǵıbratty sózderi jadymda máńgilikke saqtalady. Altyn berse de alynbaıtyn, adamǵa erekshe kórik berip, júzin nurlandyratyn nárse-bilim ekenin uǵynyp, bul sózdiń túbine tereńinen boılaı tústim.

"Ustaz bolý-júrektiń aqyldyǵy.

Ustaz bolý-sezimniń aqyndyǵy.

Ustaz bolý-minezdiń kún shýaǵy,

Azbaıtuǵyn adamnyń altyndyǵy",- deı kele, shákirtterin óz perzentterinen kem kórmeıtin tálimgerlerime kóktemniń jadyraǵan, jazdyń jaınaǵan kúnindeı qulpyrýdy, eńbekterine sáttilik pen berekeni tilegim keledi. Qazaq saharasyna eleýli jemisterińiz sińip, birtýar tulǵalardy tárbıelep, nury óshpeıtin iz qaldyryńyzdar!!!

---