InfoHub Logo

Kongo Demokratıalyq Respýblıkasynyń shyǵysyndaǵy Rýbaıa koltan kenishinde bolǵan opyrylý saldarynan 200-den astam adam qaza tapty. Bul aqparatty kóterilisshiler taǵaıyndaǵan aımaq basshysynyń baspasóz ókili Lýmýmba Kambere Mýıısa Reuters agenttigine rastaǵan.

Bul týraly Infohub.kz aqparat agenttigi habarlaıdy.

Oqıǵa sársenbi kúni tirkelgen. Juma keshine deıin qaza tapqandardyń naqty sany túbegeıli naqtylanyp bitpegeni aıtyldy. Mýıısanyń sózine qaraǵanda, opyrylý kezinde ken orny mańynda ártúrli jerde júrgen adamdar da zardap shekken.

Jańbyrly maýsymnyń áseri

Mýıısa: «Bul kóshkinniń qurbandary 200-den asady. Olardyń ishinde kenshiler de, balalar da, bazarda júrgen áıelder de bar. Keıbir adamdar der kezinde qutqaryldy, biraq aýyr jaraqat alǵandar kóp», — dedi.

Shamamen 20 jaraly adam medısınalyq mekemelerde em qabyldap jatyr. Ókil qaıǵyly jaǵdaıdyń jaýyn-shashyndy maýsymmen tuspa-tus kelgenin alǵa tartty. «Qazir jańbyrly maýsym. Topyraq bosap, álsireıdi. Adamdar shuńqyr ishinde júrgende dál sol topyraq opyrylyp tústi», — dep túsindirdi ol.

Kenishtiń mańyzy

Rýbaıa kenishi álemdik koltan óndirisiniń shamamen 15%-yn beredi. Koltannan tantal óndiriledi — bul ystyqqa tózimdi metal uıaly telefondar, kompúterler, aeroǵarysh bólshekteri men gaz týrbınalaryna qajet. Jergilikti turǵyndardyń bir bóligi kendi qolmen qazyp, birneshe dollar tabý úshin osy aımaqta jumys isteıtini de aıtylady. Kenish 2024 jyldan beri AFC/M23 kóterilisshiler tobynyń baqylaýynda.

Birikken Ulttar Uıymy AFC/M23 toby Rýbaıadaǵy paıdaly qazbany tonap, ony kórshiles Rýanda úkimeti qoldaıdy delinetin búlik áreketterin qarjylandyrýǵa jumsaıdy dep esepteıdi. Al Kıgalı mundaı aıyptaýlardy joqqa shyǵarady.