InfoHub Logo

Elbasy Nursultan Nazarbaev Aqtóbede «Jastyq! Jiger! Eńbek!» atty respýblıkalyq jastar forýmyna qatysty.

Bul týraly Aqordanyń baspasóz qyzmetinen habarlady.

Forýmǵa eldiń barlyq óńirinen úsh myńdaı jastar ókili qatysty.
İs-shara barysynda forýmǵa qatysýshylar «Gúldene ber, týǵan el!» jalpyulttyq marafon-estafetanyń bastalǵanyn málimdedi.

Memleket basshysy munda el úmit artqan eń talapshyl jastar jınalǵanyn atap ótti.

«XXI ǵasyrdy biz jahandyq syn-qaterler dáýiri ǵana emes, jas, qýatty jáne talantty adamdardyń dáýiri dep te ataımyz. Qazaqstanda búginde árbir tórtinshi azamat - jas urpaqtyń ókili. Meni sizderdiń bilimderińiz, shetel tilderin ıgergenderińiz, ınovasıaǵa ashyq bolýǵa talpynystaryńyz qýantady. Aralaryńyzda aqyly men bilimi qazirdiń ózinde Otanymyzǵa paıdasyn tıgizip jatqan jastar az emes. Álem jurty kóp uzamaı jańa qazaqstandyq ǵalymdar, dárigerler, ınjenerler, mýzykanttar men sportshylar týraly estip-biletinine senimdimin», - Nursultan Nazarbaev.

Qazaqstan Prezıdenti jastar qazirgi ýaqytta usynylyp otyrǵan múmkindikterdi paıdalanýy qajettigin aıtty.

«Biz zamanaýı bilim berý júıesin, zıatkerlik mektepter, Astanada halyqaralyq ýnıversıtet ashtyq. Jyl saıyn myńdaǵan stýdentti álemniń úzdik ýnıversıtetterine jiberemiz. Ómirdegi eń basty nárse - bilim, joǵary kásibılik jáne óz Otanyńa adaldyq, men sizderdi osyny este ustaýǵa shaqyramyn. Sizderde zor kúsh-qýat pen shyǵarmashylyq áleýet bar. Osynyń bárin ómirlerińizdegi eń basty maqsatqa jetýge baǵyttańyzdar», - dedi Memleket basshysy.

Nursultan Nazarbaev bizdiń el jastardyń áleýetin damytýǵa jáne júzege asyrýǵa qajetti jaǵdaılar jasap jatqanyn aıtty.

«100 naqty qadam» Ult josparynda jastardy qoldaýǵa baǵyttalǵan sharalar qarastyrylǵan. «Jumyspen qamtýdyń jol kartasy - 2020», «Bıznestiń jol kartasy-2020», «Dıplommen - aýylǵa», «Jasyl el» jobalary arqyly jarty mıllıon qazaqstandyq jas qamtylǵan. «Qoljetimdi baspana» baǵdarlamasy aıasynda jas otbasylarǵa 3,5 myńnan astam páter berildi. Bul jumys áli jalǵasady. 2017 jyldan bastap árbir orta mektep túlegi memleket esebinen alǵashqy mamandyǵyn meńgerip shyǵatyn bolady. Jahandyq daǵdarysqa qaramastan, biz barlyq resýrsty eńbek adamyn qoldaýǵa baǵyttaımyz. Bul bizdiń ekonomıkamyzdyń damýy úshin mýltıplıkatıvti áserdi qamtamasyz etedi, qazaqstandyqtar úshin qýatty «áleýmettik saty» qalyptastyrady jáne jastardyń ıgiligin arttyrady», - dedi Qazaqstan  Prezıdenti.

Memleket basshysy búginde elimizde joldar salynyp, ındýstrıa damytylyp, jańa jumys oryndary men ınovasıalyq kásiporyndar ashylyp jatqanyna nazar aýdardy. 

«Sizderdiń tyń ıdeıalaryńyz ben jastyq jigerlerińizdi qajet etetin júzdegen, myńdaǵan jumystar bar. 200 myńdyq sarbazy bar «Jasyl el» aksıasy naǵyz erlik boldy, olar 10 jylda 115 myń gektar aýmaqta 50 mıllıon aǵash otyrǵyzdy. Osy ıgi mısıany jalǵastyryp, Qazaqstandy jasyl ári bolashaq urpaq úshin taza ólkege aınaldyrý kerek. Sizder Ýnıversıada men halyqaralyq EKSPO-2017 kórmesin ótkizý isine belsene qatysatyndaryńyzǵa senimdimin. Osynyń bári sizder úshin, sizderdiń bolashaqtaryńyz ben elimizdiń bolashaǵy úshin jasalýda. Jastarymyz memleket qamqorlyǵyna úzdik oqýmen, sporttaǵy jáne shyǵarmashylyqtaǵy tabystarymen, Otanyna qyzmet etýimen jaýap beredi dep senemin», - dedi Nursultan Nazarbaev.

Sońynda Qazaqstan Prezıdenti eldiń barsha jastaryna sóz arnady. 

«Sizder - eldiń bolashaǵysyzdar. Sizder men bizdiń uly maqsatymyz bar. Armandar umtylǵan kezde ǵana oryndalady. Qazaqstan HHİ ǵasyrda qýatty ári ózderińmen birge órkendeıtin el bolýy úshin sizderdiń kúsh-jigerlerińiz, yntymaqtaryńyz, tabandylyqtaryńyz ben talanttaryńyz jetkilikti ekenine senemin», - dedi Memleket basshysy.

inform.kz

---