Kózimniń qarasy,
Kóńilimniń sanasy,
Bitpeıdi ishimde,
Ǵashyqtyń jarasy.

Qazaqtyń danasy,
Jasy úlken aǵasy.
Bar demes sendeı bir
Adamnyń balasy.

Jylaıyn, jyrlaıyn,
Aǵyzyp kóz maıyn.
Aıtýǵa kelgende,
Qalqama sóz daıyn.

Júrekten qozǵaıyn,
Ádepten ozbaıyn.
Ózi de bilmeı me,
Kóp sóılep sozbaıyn.

Tereńdep qaraısyń,
Telmirip turmaısyń.
Bıhabar júrgensip,
Bek qatty synaısyń.

San kisi muńaısyn,
Sabyrmen shydaısyń.
Kúıemin, janamyn,
Esh rahym qylmaısyń.

Aqylsyz bı bolmas,
Sáýlesiz úı bolmas.
Júrekte oty joq,
Adamda mı bolmas.

Shyn ǵashyq syı bolmas,
Syı bolsa, syr bolmas.
Aryzymdy aıtaıyn,
Quı bolar, quı bolmas.

Keń mańdaı, qolań shash,
Ia bir kez, ıa qulash.
Aq tamaq, qyzyl júz,
Qaraǵym, betińdi ash!

Qara kóz, ımek qas,
Qarasa jan toımas.
Aýzyń bal, qyzyl gúl,
Aq tisiń kir shalmas.

Qyr muryn, qypsha bel,
Solqyldar soqsa jel.
Aq etiń úlbirep,
Ózgeshe bitken gúl.

Qaraǵym, bermen kel,
Bizge de kóńiliń ból,
Qalqamnyń nusqasyn,
Kór, kózim, bir kenel.

Qaıǵyń – qys, júziń – jaz,
Bolamyn kórsem máz.
Kúlkińiz boıdy alar,
Bulbuldaı shyqsa áýez.

Kisimsip dúrdaraz,
Burańdap qylma naz.
Mal túgil basymdy,
Jolyńa bersem de az.

Iisiń – gúl ańqyǵan,
Nuryń – kún shalqyǵan.
Kórgende boı erip,
Súıegim balqyǵan.

Qaıaýsyz qalpynan,
Ózi artyq dańqynan.
Qyzyl til shyǵa almas,
Maqtaýdyń shartynan.

Sensiń – jan lázzáti,
Sensiń – tán shárbáti.
Artyqsha jaratqan,
Allanyń rahmaty.

Kórik – táńiri dáýleti,
Qylsa unar qurmeti.
Sulýdy súımektik —
Paıǵambar súndeti.

Ne desem saǵan ep?
Ǵashyǵyń da qaıǵy jep.
Órtengen júrekke,
Bir kórgen bolar sep.

Bizderdeı ǵashyq kóp,
Qaısysy saǵan dóp?
Jóndep te aıtpadym,
Júregim lúpildep.

Nazyńa kim shydar?
Burańdap júr shyǵar.
Qasqaıa kúlgeni,
Qylady tym qumar.

Er emes qymsynar,
Árkim-aq umsynar.
Qudaı-aý, bul kóńilim,
Kún bar ma bir tynar?

---