InfoHub Logo

Kúz týraly óleńder toptamasy
Kúz — Juban Moldaǵalıev
Kúnderi bar qyzýy ábden sónbegen,
Gúlderi bar qyzyly áli sembegen.
Kúz de meniń elý jasym sıaqty,
Jazdar ótip, qys keler dep senbegen.
Qyzyly da, qyzý da jaz sarqyny,
Tońazytqan tańǵy shyqtar salqyny,
Kúz de meniń elý jasym sıaqty
«Erteń» emes, «keshe» bolǵan sol kúni.
Jalt oınaıdy najaǵaılar jyraqta.
Shómeleler órtenbeıdi biraqta.
Kúz de meniń elý jasym sıaqty
Dirildeıdi qarap aına bulaqqa.
Birde jarqyn, birde bulttar qurystap,
Birde jańbyr, birde qary tynystap.
Kúz de meniń elý jasym sıaqty
Jaz ben kúzdiń shekarasyn tur ustap.
Sarǵysh tartyp, baqtyń júzi tur synyp,
Buıra taldar bolady ǵoı qur syryq.
Kúz de meniń elý jasym sıaqty
Áldeneni joqtaǵandaı kúrsinip.
Dalada da saırańdaǵan sary eles,
Sary sýret altyn tańnyń sóri emes.
Kúz de meniń elý jasym sıaqty,
Ne jigit jas, ne eńkeıgen kári emes.
Aǵash basyp, taý men túzdiń taz jonyn
Qyzdyratyn qytyp jumsap az shoǵyp,
Kúz de meniń elý jasym sıaqty
Biledi ǵoı bir jylda eki - jaz joǵyn.
Kúzde, biraq jaırap jatyr jemister.
Kúzde shynar jyldyq ister, jumystar.
Kúzder meniń elý jasym sıaqty,
Alańy joq sharýadaı jumysker.

Taǵy da kúz, taǵy, mine, sary tańdy uzaq tún — Muqaǵalı Maqataev
Taǵy da kúz, taǵy, mine, sary tańdy uzaq tún,
Ýysynda taǵy da men uıqy deıtin tuzaqtyń,
Oı - hoı, shirkin, taǵy da bir kúzdi, mine, uzattym,
Ómirimniń eseıgenin sezinemin kúzde men,
Aldaǵyma asyǵamyn, ótkendi áste izdemen,
Oı - hoı, shirkin, bolashaqqa qumarmyz ǵoı biz degen.
Júrshi, janym, qońyr kúzde serýendeıik jyraqta,
Qaıtqan qustyń áýenimen qoshtasaıyq qyratta,
Kúz ótkenge keıimeımin, saǵynamyn biraqta.
Qaıtyp bara jatyr, áne, saǵynyshtar - tyrnalar,
Aq qaıyńdar, tal, terekter… altyn sary syrǵalar,
Týǵan jerdiń keýdesinde tunjyraıdy jylǵalar.
Qaıda ketken jasyl alqap, jasyl orman, jasyl mań?
Qaıda ketken jaqut gúlder pań dalaǵa shashylǵan?
Qaıda ketken, qalaı ótken, kimge baryp bas urǵan?!
Qalaı bizder qapelimde ańǵara almaı qalǵanbyz?!
Áttegen - aı, netken ańqaý, netken ańqaý jandarmyz?
Kelip qapty - aý saǵynyshtaı sap - sarala arman - kúz…

Kúz — Qalqaman Sarın
Kúńirengen, kúrsingen kúzdiń aýyr,
Minezine úırengen bizdiń aýyl.
Buıra shańyn kóterip qyrat - qyrdyń,
Berekesin bir sátte buzdy daýyl.

Janarymda jabyrqap jaz jylady,
Jylaǵany emes pe, qazdyń áni?!
Qaıran meniń júregim, qaıtqan qustyń,
Qanatynan úzilgen sazdy uǵady.

Jańa mezgil jelbirep jalaýy tik,
Jaýlap aldy jer betin qalaýy utyp.
Jyly ólkeniń jamalyn jasqa shylap,
Qara aspannyń kózi tur qaraýytyp.

Jadyraǵan jazdyń da kúıi osal tym,
Mezgili ótti. Qus júdeý, uıa salqyn.
…Kúzdiń jyryn jazady bir Qudiret,
Bir ǵajaıyp qalammen sıasy altyn.

Sap - sary japyraqtar — Muqaǵalı Maqataev
Sap - sary japyraqtar…
Sal - sary japyraqtar…
Saýdyrap qulap jatyr atyrapqa.
Bireýdiń janarynda,
Bireýdiń tabanynda,
Sap - sary japyraqtar joǵalýda.
Qaýsaǵan qańqasy tur aǵashtardyń,
Jasyl baq tonalýda, tonalýda.
Estilmeı qustyń áni,
Estilmeı qustyń úni,
Jalǵannyń ketti sáni, ushty; gúli.
Syrǵasynan aırylǵan aq qaıyńnyń,
Basyna bar ǵalamnyń tústi muńy.
Sap - sary japyraqtar,
Sap - sary japyraqtar,
Saýdyrap qulap jatyr atyrapqa.

Taǵy kúz týraly óleńder
Kúz týraly taqpaqtar
Kúz
Qazan
​Kúz​​​