InfoHub Logo

Tanymal telejúrgizýshi Láılá Sultanqyzy Shymkentte qaıtys bolǵan jas qyzdyń ólimine baılanysty óz pikirin bildirip, qoǵamdy oılandyrdy. Bul oqıǵa qoǵamda úlken rezonans týdyrdy.

Bul týraly Infohub.kz aqparat agenttigi habarlaıdy.

Láılá Sultanqyzynyń janaıqaıy

Láılá Sultanqyzy jas qyzdyń otbasyna qaıǵyra kóńil aıtty. Ol óziniń áleýmettik jelidegi jazbasynda: "Ózimdi ornyma qoıyp, jan dúnıem alaı-dúleı boldy. Oılashy, qansha arman, qansha eńbek, ata-ananyń úmiti bir jaýyzdyń kesirinen dalaǵa ketti. Zań da, tártip te oryndalar. Qadaǵalanar. Jaza beriler. Ol ómir boıy temir tordyń ar jaǵynda otyrsa da, Nuraı qaıtyp kelmeıdi. «Óltirmeı, hotá by urmady ma?» «Ózi búıtken shyǵar, sóıtken shyǵar» degen pikirlerdi oqyǵanda tóbe shashyń tik turady… Qalaı? Bárimizdiń ápke-sińlimiz, anamyz, qyzymyz bar emes pe? Qazaqstan Respýblıkasynyń Konstıtýsıasynda anyq jazylǵan: «Eń qymbat qazyna — adam jáne adamnyń ómiri, quqyqtary men bostandyqtary». Eshbir tiri jan soqqyǵa da, qol kóterýge de tózýge mindetti emes. Ólgen adamnyń kúıin keshý múmkin emes. Al ata-ana she? Baýyr etińnen aıyrylýdan aýyr jaza joq. Nuraıdyń anasymen tolyq kelisemin, qylmyskerge eń aýyr jaza berilse de, ananyń júrek tynyshtyǵy qaıtyp kelmeıdi. Qaıǵyryp kóńil aıtamyn. Men ádiletsizdikke, qatigezdikke, durys tárbıe bermegen ata-anaǵa, toqtaý aıtpaǵan «dossymaqtarǵa» ókpelimin", - dedi telejúrgizýshi.

Jigitterge eskertý

Láılá Sultanqyzy jigitter qaýymyna erekshe eskertý jasady: "Aıtpaqshy, qyzdar, jigittiń artynan qalmaýy, qaıta-qaıta izdeýi, alǵan betinen qaıtpaýy - jigittik emes. Bul - stalkerlik. Zańmen qýdalanady. Onlaın bolsyn, oflaın bolsyn - úlken qylmystyń bastaýy. Jigitter! Namys degen - kúsh kórsetý emes. Namys - toqtaı bilý. Namys - «joqty» qabyldaý. Namys - álsizge qol kótermeý. Namys - qorǵaý, qorlaý emes. Osyny túsinbesek - keıin taǵy da kesh bolady", - dedi Láılá Sultanqyzy.