InfoHub Logo

On jyldan keıin Batys Qazaqstan, Aqtóbe, Qostanaı, Qaraǵandy, Aqmola, Soltústik Qazaqstan, Pavlodar jáne Shyǵys Qazaqstan oblystarynda halyqtyń sany azaıady. Solardyń ishinde eńbekke jaramdy azamattar 10-17 paıyzǵa deıin tómendeıdi. Osyǵan baılanysty «Serpin -2015» baǵdarlamasyn jan-jaqty damytyp, adam sany kóp oblystarda turatyn jastardy atalǵan aımaqtarǵa kóptep kóshirý kerek. Onsyz ol óńirlerdiń ekonomıkalyq damýy tejeledi, dep habarlaıdy QazAqparat.

«Jumysqa jaramdy azamattar azaıǵan saıyn jumystyń kórsetkishi tómendeıdi. Demek, belgili bir jumys tobyn almastyratyndar joq. Qazirdiń ózinde mektepter, aýrýhanalar sıaqty búdjettik mekemelerde adam tabylmaı jatyr. Ońtústikte ondaı jumys tabylsa, halyq sany azaıyp kele jatqan aımaqtarda maman tapshy. Tipti, jastar arzan qyzmetke barǵysy kelmeıdi. Sonyń saldarynan bıznes te damymaıdy. Al bıznes qaı jerde damıdy? Adam sany kóp jerde damıdy. Sebebi ondaı ortada básekelestik bar. Máselen, biz Rıdder qalasynda boldyq. Ol qalada 65 myń adam turady. Bar bolǵany 126 adam jumyssyz júr. Solardyń artynan júgiremiz deıdi, jumys isteshi, 60 myńǵa eń bolmasa, kóshe sypyr dep. Jańa avtobýs bos tur. 150 myń aılyq, eshkim jumys istegisi kelmeıdi. Polısıaǵa baratyn adam joq. Osylaısha, halyq arasynda básekelestik bolmaǵasyn, naryq tómendeıdi», - dedi «Serpin-2050» áleýmettik jobasy boıynsha respýblıkalyq úılestirý keńesiniń tóraǵasy Murat Ábenov.

Onyń aıtýynsha, bolashaqta atalǵan aımaqtarda qansha óndiristik oshaq ashamyz desek te, sonyń barlyǵyn iske qosa almaımyz. Sebebi jumys isteımin deýshilerdiń qatary sırep jatyr. Atalǵan máseleni sheshý úshin mamandardy syrttan ákelý kerek, ıa bolmasa, «Serpin-2050» baǵdarlamasy aıasynda ishki kóshi-qondy kúsheıtý kerek.

«Sondyqtan qazirgi kezde biz adam sany kóp aımaqtarda turatyn jastardy erterek kóshirip, sol jerlerde beıimdelýin qamtamasyz etpesek, erteń ekonomıkalyq ǵana emes, tipti saıası-áleýmettik problemalarǵa da tap bolamyz. Qazirdiń ózinde keıbir jerlerde mektep oqýshylary úsh aýysymmen oqıdy, balabaqshada oryn joq, kolejderde oryn jetispeıdi. Máselen, Qyzylorda oblysynda 100 bala oqýdy bitirse, 17-aq balaǵa kolejde oryn bar. Árıne, jumyssyzdyq osydan týyndaıdy. Al Shyǵys Qazaqstan oblysynda budan bes jyl buryn kolejderde 17 myń adam oqysa, qazir 10-aq myń adam bilim alady. Oqıtyn balalar joq. Búginde kóbisi «Serpin» baǵdarlamasy ońtústik óńirlerge arnaldy dep oılaıdy. Áste olaı emes. Atalǵan baǵdarlama barlyq  aımaqtarǵa arnalǵan. Osyny qoǵamǵa durys túsindirýimiz kerek», - dep atap kórsetti M.Ábenov.

---