InfoHub Logo

Fransıa prezıdenti Emmanýel Makron Eýropanyń qaýipsizdigi men qorǵanysyna qatysty mańyzdy málimdeme jasady. Ol Reseıdiń áskerı qýatyn arttyryp jatqanyn, al Eýropa elderi buǵan daıyn bolýy kerektigin aıtty.Bul týraly Infohub.kz tilshisi habarlaıdy.

Makronnyń aıtýynsha, Reseı 2030 jylǵa deıin qarýly kúshterin aıtarlyqtaı ulǵaıtýdy josparlap otyr. Jańa málimetterge sáıkes, Máskeý 3 mıllıon adamdy mobılızasıalap, 4 myńnan astam tank shyǵarýǵa nıetti. Bul Eýropaǵa tikeleı qaýip tóndirýi múmkin.

Eýropa áskeri Ýkraına aýmaǵyna kirýi múmkin

Fransıa basshysy Ýkraınaǵa áskerı kómek kórsetýdiń jańa formattary qarastyrylyp jatqanyn málimdedi. Ol keıbir eýropalyq elderdiń Ýkraına jerine áskerin ornalastyrý múmkindigin joqqa shyǵarmady.

Fransıa – Eýropanyń basty qorǵanysy

Makron óz eliniń qorǵanys salasyndaǵy rólin erekshe atap ótti. Onyń aıtýynsha, Fransıa Eýropadaǵy eń qýatty armıaǵa ıe jáne ıadrolyq qarýy bar memleket retinde odaqtastaryna qorǵan bola alady. Sonymen qatar, ol Eýropanyń qaýipsizdigin tek AQSH-qa senip tapsyrýǵa bolmaıtynyn aıtty.

AQSH-tyń ustanymy ózgerýde

Fransıa prezıdenti Vashıngtonnyń Ýkraınaǵa qatysty saıasaty ózgergenin atap ótti. AQSH-tyń qoldaýy báseńdegen jaǵdaıda, Eýropa óz qaýipsizdigin ózi qamtamasyz etýi kerek. Osyǵan baılanysty, kelesi aptada Ýkraınany qoldaıtyn elderdiń qarýly kúshteri bas shtab basshylarynyń arnaıy kezdesýi ótetini habarlandy.

Beıbitshilik qandaı jolmen ornaıdy?

Makron beıbitshilikke qol jetkizý úshin Ýkraınadan bas tartý nemese Reseıdiń talaptaryna kóný joly durys emes ekenin basa aıtty. Ol Eýropa elderimen birigip, qaýipsizdik máselesin jan-jaqty talqylaýǵa daıyn ekenin málimdedi.

Bul málimdeme Eýropanyń qorǵanys saıasatyna jańa ózgerister ákelýi múmkin. Fransıanyń ustanymy aıqyn: eýropalyq qaýipsizdikti qamtamasyz etýde belsendi ról atqarý.