InfoHub Logo

Qazaqstannyń agrarlyq sektoryndaǵy kadr tapshylyǵy men et baǵasynyń ósýine baılanysty úkimet malshylar men veterınarlardyń jalaqysyn kóterýdi josparlap otyr. Bul sharalar sala mamandarynyń bedelin arttyryp, eńbek ónimdiligin joǵarylatýǵa baǵyttalǵan.

Bul týraly Infohub.kz aqparat agenttigi habarlaıdy.

Malshylar men shopandardyń eńbegi baǵalanady

Kóshpeli mal sharýashylyǵyndaǵy baqtashylar men shopandardyń eńbegi «zıandy eńbek jaǵdaıy» retinde tanylyp, olardyń jalaqysynyń bir bóligi búdjetten óteletin bolady. Bul týraly vıse-premer – ulttyq ekonomıka mınıstri Serik Jumanǵarın málimdedi. Onyń aıtýynsha, «Mal sharýashylyǵyn damytýdyń 2026–2030 jyldarǵa arnalǵan keshendi jospary» aıasynda sala qyzmetkerlerin áleýmettik qorǵaýdy arttyrý sharalary qarastyrylǵan.

Eger bul bastama iske assa, malshylar 55 jastan asqan soń erte zeınetke shyǵyp, arnaýly áleýmettik tólem ala alady. Bul tólem 2024 jyldan bastap engizilgen jáne ortasha eseppen 200 myń teńgeden asady. Tólem alý úshin 7 jyldyq kásiptik zeınetaqy aýdarymdary men 55 jasqa tolý talap etiledi.

Veterınarlardyń jalaqysy eselenedi

Agrarlyq sektordyń taǵy bir mańyzdy býyny – veterınarıa salasy. Mal dárigerleriniń jalaqysyn kóterýge 2023–2025 jyldary 29,6 mlrd teńge, al 2026–2028 jyldary jyl saıyn 12,2 mlrd teńge bólý josparlanǵan. Nátıjesinde, mal dárigerleriniń ortasha jalaqysy 119,7 myńnan 271,5 myń teńgege deıin ósti.

Sonymen qatar, veterınar mamandaryna İ jáne İİ toptaǵy patogendi bıologıalyq agenttermen jumys istegeni úshin qosymsha ústemeaqylar belgilendi. Ǵylym kandıdaty nemese doktory dárejesi bar mamandarǵa jalaqysyna qosymsha aqy qarastyrylady.

Aýyl sharýashylyǵyna mamandar daıarlaý

Mal sharýashylyǵyna qajetti mamandardy daıarlaý úshin nysanaly granttar men stıpendıalar mólsheri ulǵaıtylady. 2025/2026 oqý jylynda «Aýyl sharýashylyǵy jáne bıoresýrstar» baǵyty boıynsha 3 018, al «Veterınarıa» boıynsha 1 451 grant bólindi. Aýyl balalary úshin joǵary bilimniń qoljetimdiligin arttyrý maqsatynda aýyldyq kvota 35%-ǵa deıin ulǵaıtylyp, UBT-nyń shekti baly 50-ge deıin tómendetildi.

Aýyl sharýashylyǵy mamandyqtarynda oqıtyn stýdentterdiń shákirtaqysy 2025 jyldyń 1 qyrkúıeginen bastap 20%-ǵa, al 2020 jylmen salystyrǵanda eki esege ulǵaıtylyp, 52 372 teńgeni qurady. Degenmen, stıpendıany odan ári kóterý granttardyń ıgerilýine áser etýi múmkin degen alańdaýshylyq ta bar.