InfoHub Logo

Álemde alǵash ret Malta eliniń barlyq azamattaryna ChatGPT Plus-qa tegin qoljetimdilik beriledi. Bul týraly Amerıkanyń OpenAI kompanıasy men Malta úkimeti arasyndaǵy biregeı seriktestik aıasynda habarlandy.

Bul týraly Infohub.kz aqparat agenttigi habarlaıdy.

OpenAI kompanıasynyń resmı saıtynda jarıalanǵan málimetke sáıkes, bul bastama azamattarǵa jasandy ıntellektini (JI) jaýapkershilikpen paıdalanýdy úıretýge baǵyttalǵan. Malta ýnıversıteti ázirlegen arnaıy kýrs aıaqtalǵannan keıin, qatysýshylar bir jyl boıy ChatGPT Plus qyzmetin tegin paıdalana alady.

Baǵdarlamanyń alǵashqy kezeńi

Jobanyń alǵashqy kezeńi mamyr aıynda bastalady. Maltanyń sıfrlyq ınovasıalar basqarmasy baǵdarlama talaptaryna sáıkes keletin qatysýshylarǵa qoljetimdilikti qamtamasyz etedi. Jospar boıynsha, el turǵyndary men sheteldegi azamattar kýrsqa kóbirek qatysa bastaǵan saıyn, bul múmkindik keńeıtiledi.

Malta – sıfrlyq dáýirdiń kóshbasshysy

Maltanyń ekonomıka, kásipkerlik jáne strategıalyq jobalar mınıstri Sılvıo Shembrı bul seriktestiktiń mańyzdylyǵyn atap ótti. «Malta mundaı aýqymdy seriktestikti bastaǵan alǵashqy el boldy, sebebi biz azamattarymyzdyń sıfrlyq dáýirde artta qalýyn qalamaımyz. Biz halqymyzdy jahandyq ózgeristerdiń aldyńǵy qataryna shyǵaramyz», - dedi mınıstr.

OpenAI ókilderi bul seriktestik arqyly Maltanyń azamattaryna JI qoljetimdiligin usynýda Eýropa men álemdegi kóshbasshy elderdiń birine aınalǵanyn aıtty. Kompanıa basqa elderdiń de osy úlgini úlgi etýine úmit bildirdi.

Malta – Jerorta teńizinde ornalasqan, aýmaǵy 320 sharshy shaqyrymdy quraıtyn parlamenttik respýblıka. Eldiń halqy 500 myńnan asady. Qazirgi tańda ChatGPT Plus jazylymynyń aılyq quny 20 AQSH dollaryna teń.